Оюутолгой ХХК ажилчдынхаа цалинг бодохдоо Хөдөлмөрийн хуулийн 8-9 зүйл заалт болон Үйлдвэрчний эвлэлийн хамтын гэрээний заалтуудыг мөрдөхгүй, илүү цагийн мөнгө олгохгүй байгаа талаар компанийн ажилчид мэдээлэл хийж байна.

Оюутолгой ХХК  ажилчдынхаа цалинг 25-30 орчим хувиар, тэр дундаа дундаж цалин авдаг ажилтнуудын шөнийн ээлжийн нэмэгдэл, ээлжийн амралтын олговор, шагнал урамшууллыг хасахаар болсон. Тэдний хэлснээр цалинг 2024 оны хоёрдугаар сарын 7-нд хасах шийдвэр гаргасан.

Шөнийн ээлжийн нэмэгдэл, ээлжийн амралтын олговор, шагнал урамшуулал, нэмэгдэл цалинг хасах нь хөдөлмөрийн гэрээний гол нөхцөлийг зөрчиж байна гэв. Хүн бүр Үндсэн хуулийн ажил хөдөлмөр эрхлэх эрхтэй ч компанийн хувьд гаргасан шийдвэрээ өнөөг хүртэл огт хэлэлцэлгүй нөхцөл байдлыг хүндрүүлсээр байна. 

Компанийн зүгээс 25 хувиар буурна гэж байгаа ч бид өөрсдөө тооцоолоход цалин 50-60 хувь буурсан. Харамсалтай нь, үйлдвэрчний эвлэл бидний төлөө ажилласангүй.

Оюутолгой компани олон ажилчдыг хохироосон шийдвэрийн талаар огт тайлбар хийгээгүй. Иймээс компанитай тохиролцоо хийхгүй гэлээ.

---