Цагдаагийн байгууллагаас цаг үеийн асуудлаар мэдээлэл хийв. 

Өнөөдрийн хэвлэлийн хурлаар 

1. Цагдаагийн байгууллагад өнгөрсөн 14 хоногийн хугацаанд шалгасан хэргийн тоо мэдээ, зарим нэг олны анхаарал татсан хэргийн мэдээ
2. Кибер гэмт хэргийн талаар илрүүлэлт, шийдвэрлэлтийн талаар
3. Согтуу жолоочтой холбоотой хэрэг, зөрчлийн тоо мэдээлэл өгч байна. 

ЦЕГ-ын ХМТ-ийн дарга, хурандаа Б.Батзориг:

-Олон нийтийн цахим сүлжээнд нийтлэгдсэн мэдээллийн талаар товч танилцуулъя. Хан-Уул дүүргийн 13-р хороонд амьдардаг иргэн Б гэх 47 настай эрэгтэй хүнтэй хамт амьдарч байсан иргэн Ц нь 2024 оны нэгдүгээр сарын сарын 18-ны өдрөөс хойш сураггүй алга болсон. Түүнийг өөрийн ойр дотны хүмүүстэйгээ холбоо тогтоохгүй байна гэдэг гомдол мэдээллийг цагдаагийн байгууллагад 2024 оны хоёрдугаар сарын 21-ний өдөр бүртгүүлсэн байдаг.

Ингээд цагдаагийн байгууллагаас мөрдөн шалгах хойшлуулшгүй ажиллагааг явуулж байна. Шалгалтын явцад дээрх тоотод оршин суух Б-ийн гэр болон тээврийн хэрэгслээс НҮБ-ын мансууруулах эмийн тухай нэгдсэн конвенцын жагсаалтад багтдаг нэр бүхий сэтгэцэд нөлөөтэй эм бэлдмэл бодис илэрсэн байж болзошгүй нөхцөл байдал тогтоогдсон. Түүнийг яллагдагчаар хоёрдугаар сарын 23-ны өдөр татаж цагдан хорьсон. Хэргийн мөрдан шалгах ажиллагаа үргэлжилж байна. Тус этгээд нь олон тооны нохой тэжээдэг болох нь тогтоогдсон.

Иргэн Ц-г алга болсон хэрэгт ажлын хэсэг гаран мөрдөн шалгах ажиллагааг үргэлжлүүлж байна. Цахим орчинд "мансуурсан этгээд найз охиноо хөнөөж, нохойд хаяж өгч хоолложээ" гэх зэргээр иргэдийг сэртийлгэм мэдээ нийтэлж байгаа нь одоогоор батлагдаагүй гэдгийг хэлэхийг хүсэж байна гэв. 

---