Баянгол дүүргийн 29 дүгээр хороо, Баянгол бизнес инкубатор төвд хоёрдугаар сарын 14-ний өдөр гарсан галын талаар худалдаа эрхлэгчид өнөөдөр мэдээлэл хийв.

Гал гарсан тус газарт нийт 136 иргэн худалдаа, үйлчилгээ эрхэлдэг байжээ. Мөн худалдаачид тус газарт даатгал хийлгэхээр өмнө нь хандаж байсан ч үл хөдлөх хөрөнгийн гэрчилгээгүй газарт даатгал хийх боломжгүй гэсэн хариу авч байсан гэлээ. 

Худалдаа эрхлэгчид:

-Юуны өмнө бидэнд сэтгэлзүйн болон бусад дэмжлэгийг үзүүлж байгаа Баянгол дүүргийн удирдлагууд, төрийн албан хаагчид, нийслэлийн засаг даргын орлогч П.Сайнзоригт талархлаа илэрхийлье. Бид гал гарсны маргааш шууд нийслэл дээр ирсэн. Гэхдээ бид төрөөс мөнгө хүсээгүй. Төр бол мөнгө тараадаг газар биш. Харин биднийг ямар нэг ААН, бизнесийн байгууллагатай холбоод хүү багатай зээл олгоход цаашлаад үйл ажиллагаагаа дахин эхлэх, жигдрүүлэхэд туслалцаа үзүүлэхийг хүсэж байна. 

Гал гарах үед манай төвийн гадаах хяналтын камер хэвийн ажиллаж байсан ч хард диск нь хоёрдугаар сарын 8-ны өдрөөс хойш бичлэг бичээгүй буюу бичлэг хадгалж аваагүй байна. Иймд битүүний урд өдөр буюу худалдаачдын анхаарал сарнисан энэ үед мэргэжлийн өндөр түвшинд гүйцэтгэх ажиллагаа явуулсан юм биш байгаа гэдэг хардлага байна.

Урьд нь цагдаагийн байгууллага ойр орчимд гарсан гэмт хэрэг, зөрчлийг манай камер дээрээс олон удаа илрүүлж байсан. Гэтэл яг гал гарахаас долоо хоногийн өмнө ажиллахаа больсон байна.

Тус худалдааны төвийн газар "2015 оноос зөрчлийн хуулиар өдөр болгон торгуулж байна. Хууль чинь болохгүй байна гэж эсэргүүцэж явсаар Засгийн Газарт асуудлаа тавьж, Нийслэлийн захирагчийн ажлын алба, Баянгол дүүргийн захирагчийн ажлын албаны дэмжлэгтэйгээр  хөдөлгөөнт инкубатор төвийг үүсгэн байгуулсан. 

Бид энэ газрыг хогийн цэг байхад нь ашиглаж худалдааны төв болгон гудамжинд худалдаа эрхэлж байсан бизнес эрхлэгчид үйл ажиллагаагаа явуулж байсан юм. 136 хүн ахуй амьдралаа авч явж байсан буянтай газар. Бид өрөө төлж дуусаад хуримтлалтай болно гээд байж байтал ийм гэнэтийн аюул тулгарлаа. Тус газарт даатгал хийлгэхээр өмнө нь хандаж байсан ч үл хөдлөх хөрөнгийн гэрчилгээгүй газарт даатгал хийх боломжгүй гэсэн хариу авч байсан гэлээ. 

---