Нийслэлийн 33 байршил болон Сэлбэ гол дагуу халиа тошин үүссэн бөгөөд цаашлаад шар усны үер болох эрсдэлтэй байгаа билээ. Иймээс мэргэжлийн байгууллагуудын саналыг үндэслэн Нийслэлийн Засаг дарга бөгөөд Улаанбаатар хотын Захирагч Х.Нямбаатар үерийн эрсдэлтэй бүсүүдэд гамшгийн шар түвшин тогтоосон юм. Халиа тошингийн нөхцөл байдал, шар усны үерээс урьдчилан сэргийлэх ажлыг зохион байгуулахаар төлөвлөөд байна.

Нийслэлийн Засаг дарга Х.Нямбаатар өнөөдөр Сэлбэ голд үүссэн халиа тошингийн нөхцөл байдлыг шалгаж байна. Энэ талаар тэрээр хэвлэлийнхэнд мэдээлэл өглөө.

Нийслэлийн Засаг дарга Х.Нямбаатар:

-Халиа үүссэнтэй холбоотойгоор үер болох эрсдэл шар түвшинд байна. 1991 оноос хойш байгаагүй их хэмжээний хур тунадас орсон учраас ойр орчмын гадаргуу дээр цасан бүрхүүл тогтсон. Температурын хэлбэлзэл маш их өндөр байна гэдэг мэдээллүүдийг мэргэжлийн байгууллага өгсөн. Ус цаг уур орчны шинжилгээний газрынхан шар усны үер болох эрсдэл өндөр байна гэдгийг бичгийг бидэнд ирүүлсэн. Шар усны үер яаж болдог вэ гэхээр ууланд хуримтлагдсан цас нь температур хэт дулаарсан нөхцөлд хайлж, огцом урсаад шар усны үерийг бий болгодог гэдгийг мэргэжлийн байгууллага зөвлөж байна.

Сэлбэ голын ай сав газрын мөсийг зөөж, Сонсголонгийн гүүрнээс баруун тийш гаргаж хаях ажлыг хийнэ. Хүмүүс янз бүрийн шүүмжлэл хэлж болно. Бид онцгой байдал, Ус цаг уур орчны шинжилгээний хүрээлэн болон бусад газруудаас өгсөн зөвлөмжүүдийн дагуу хамгийн түрүүнд Сэлбэ голын сав газрыг чөлөөлөх ажлыг эхлүүлж байна. Нийт 10 газар энэ ажлыг эхлүүлж байна.

Мөн Толгойтын гол, Нарангийн гол, Улиастайн гол зэрэг бусад гол болон үерийн усны байгууламжуудыг чөлөөлөх ажлуудыг давхар хийнэ гэсэн төлөвлөгөөтэй ажиллаж байна гэв. 

---