Хөшөөтийн коксжих нүүрсний бүлэг ордын лицензийг эзэмшин үйл ажиллагаа явуулдаг гадаадын хөрөнгө оруулалтай “МоЭнКо“ ХХК Ховд аймагтай 2011, 2014 онд хамтран ажиллах гэрээ байгуулан ажиллаж буй юм. Гэвч тус компани гэрээний үүргээ биелүүлэхгүй үйл ажиллагаагаа явуулсаар байгаа талаарх нээлттэй сонсголыг УИХ-ын гишүүн Ш.Адьшаагийн ажлын албанаас зохион байгуулж байна. Нээлттэй сонсголыг нээж, УИХ-ын гишүүн Ш.Адьшаа үг хэлсэн юм.

УИХ-ын гишүүн Ш.Адьшаа:

-Монгол Улсын Үндсэн хуулийн 6.2-т заасанчлан байгалийн баялаг ард түмний мэдэлд байх энэхүү Үндсэн хуулийн зарчмыг хэрэгжүүлэх бодлогын үүднээс сүүлийн жилүүдэд Монгол Улсын их хурал, түүнчлэн ард түмний төлөөлөл болсон УИХ-ын гишүүдийн зүгээс орон нутгийн болон төрийн өмчийн үйлдвэр, ашигт малтмалын асуудлыг ярьж байгаа.

Түүний нэг болох “МоЭнКо“ ХХК-ийн хөрөнгө оруулалт, үйл ажиллагаа явуулах гэрээний хэрэгжилт дээр нийтийн эрх ашиг хөндөгдсөн асуудлаар өнөөдөр нээлттэй хэлэлцүүлэг зохион байгуулж байна.

Хэлэлцүүлэгт “МоЭнКо“ компани, Ховд аймгийн иргэдийн хурал, аймгийн удирдлага, хэвлэл мэдээлэл, иргэдийн төлөөлөл оролцож, олон нийтэд нээлттэй болж байна.  

Тус компанийн 2011 оны гэрээ буюу Ховд аймгийн Дарви суманд 36 мегаваттын цахилгаан станц барих, нүүрс боловсруулах үйлдвэр барих гэсэн нийтийн эрх ашиг хөндөгдсөн асуудлыг өнөөдөр хэлэлцэх гэж байна.

Түүнчлэн, 2014 оны гэрээгээр “МоЭнКо“ компани Ховд аймагт 10 сая тонн нүүрс өгөх, нөхөн сэргээлтэд зориулж ойжуулах төслийг хэрэгжүүлэх тухай гэрээ байгуулсан. Энэ гэрээ өнөөдөр хэрэгжихгүй цуцлагдсан байгаа. Нийтийн эрх ашиг хөндөгдөж байна. Олон улсын хөрөнгийн бирж дээр гарсан компани хүлээсэн үүргээ биелүүлэхгүй байгаа асуудлыг өнөөдөр хэлэлцэнэ.

Энэ хэлэлцүүлгээр улстөржиж, хэн нэгнийг харлуулах асуудал байхгүй. Ховд аймгийн иргэд, монголчуудын эрх ашгийн асуудал хөндөгдөнө. Энэ компани гэрээгээр хүлээсэн үүргээ биелүүлэхгүй байгаа асуудлыг хөндөж ярина гэв. 

---