Ховд аймгийн Жаргалант суманд байрлах “Цахилгаан барааны дэлгүүрт хулгай орсон байна” гэх дуудлага, мэдээлэл Цагдаагийн байгууллагад энэ оны 02 дугаар сарын 04-ний өдөр бүртгэгджээ.

Тус аймгийн цагдаагийн газраас мөрдөн шалгах ажиллагаа явуулж, эрэн сурвалжлах ажиллагааны хүрээнд Говь-Алтай аймгийн цагдаагийн газрын алба хаагчидтай хамтран шалгалтыг шуурхай зохион байгуулжээ. Ингээд сэжигтэй этгээдийг Говь-Алтай аймгийн нутаг дэвсгэрээр дамжин Улаанбаатар хот руу зорчих үед нь баривчилжээ. Тус этгээдээс хулгайн эд зүйл болох 25 ширхэг гар утас, 4 ширхэг зөөврийн компьютерыг эд мөрийн баримтаар түр хураан авч, мөрдөн шалгах ажиллагаа явуулж байна.

Иймд худалдаа, үйлчилгээний чиглэлээр үйл ажиллагаа явуулдаг аж ахуйн нэгжүүд гадна болон дотор орчны хяналтын камер, дохиолол хамгаалалтын хэвийн ажиллагааг хангаж, сар шинийн баяр, амралтын өдрүүдэд эргүүл, жижүүр ажиллуулж болзошгүй эрсдэлээс урьдчилан сэргийлэхийг цагдаагийн байгууллагаас сэрэмжлүүлж байна. 

---