Шадар сайд С.Амарсайхан, ОБЕГ-ын дарга Г.Ариунбуян, Мөрдөн байцаах албаны дарга, цагдаагийн хурандаа Н.Мишигдорж нар Баянзүрх дүүргийн 26-р хороо Их Монгол, Дүнжингарав худалдааны төвийн авто замын уулзварт гарсан гал түймэртэй холбоотойгоор авч буй арга хэмжээний талаар мэдээлэл өглөө. 

Мөрдөн байцаах албаны дарга, цагдаагийн хурандаа Н.Мишигдорж:

-Дуудлага мэдээллийг аваад хэргийн газарт 189 мөрдөн байцаагч ажилласан. Мөн Чингэлтэй, Баянзүрх дүүргийн Тээврийн прокурорын газрын 31 прокурор, Шүүхийн шинжилгээний газрын 51 шинжээч ажилласан. Цагдаагийн байгууллага хэргийн газрыг үнэлээд түргэн шуурхай арга хэмжээ авч ажилласан. Олон автомашин шатсан, хэд хэдэн барилгад гал гарсан. Хэргийн газрын хамрах хүрээ том байсан. Иймд ажлын хэсэг томилон ажиллуулж, тухайн өдрийн 22:00 цаг гэхэд хэргийн газрын үзлэг дуусаж, зорчих хэсгийг чөлөөлсөн.

Хэвлэл мэдээллийн байгууллагаас хоёр жолоочийг цагдан хорьсон гэдэг мэдээлэл гарсан. Цагдан хорино гэдэг нь яллагдагчаар татагдсан нөхцөлд нэг сарын хугацаатай цагдан хорьдог. Хоёр жолоочийн тухайд, тэднийг Эрүүгийн хэрэг хянан шийдвэрлэх тухай хуулийн дагуу шүүхийн зөвшөөрөлтэйгөөр 48 цагийн хугацаатай баривчилсан. Их хэмжээний хохирол учирсан, гурван хүний амь хохирсон, хэд хэдэн орон сууцад гал гарсан, онц их хэмжээний хохирол учирсан учраас хоёр жолооч сэтгэл санааны тогтворгүй байгаа тул өөрийн болон бусдын амь нас, эрүүл мэндэд хохирол учрах эрсдэл үүссэн гэж үзэж прокурорын саналаар шүүхийн зөвшөөрөлтэйгөөр баривчилсан.

“Ниссан патрол” маркийн машин нь Батлан хамгаалах яамны машин байсан. “Дашваанжил” ХХК буруутай эсэхийг шалгана. Хэргийн газрын шалгалтын явцад “Дашваанжил” ХХК-д үзлэг, шалгалт хийсэн. Тээврийн хэрэгсэл нь зөвшөөрөлтэй юу, үгүй юу гээд шалгаж байна. Осолд хоёр жолоочийн хэн нь буруутай эсэх, хоёулаа буруутай эсэхийг шалгаж байна. Шалгалтын ажиллагаа үргэлжилж байна гэв. 

---