УИХ-ын гишүүн А.Адъяасүрэн Ч.Хүрэлбаатар сайдыг санаачилсан хуулиа татаж авахыг сануулав. 

УИХ-ын гишүүн А.Адъяасүрэн:

-Иргэд сонгогчдоос ихээхэн санал ирж байна. Монгол хүн монгол газрынхаа эзэн байх тухай ярьж байна. Хөрөнгө оруулалт нэрээр газраа гадаадын иргэдэд өгөх далд санаа агуулсан хууль оруулж ирж байгаад харамсаж байна.

Дэлхийн улс орнууд гадаадын хөрөнгө оруулалтын хуулиндаа тодорхой нөхцлүүдийг тавьдаг. Тухайлбал, АНУ-д гадаадын хөрөнгө оруулалтын статус авахын тулд 800 мянган ам.долларын босго тавьдаг. БНСУ 100 сая вон. "Босгоо намсгахгүй бол, газраа үнэгүй ашиглуулахгүй бол хөрөнгө оруулалт хийхгүй" гэдэг гадаадын нэг ч бизнес байхгүй.

Манайд томоохон хөрөнгө оруулагчид орж ирэхгүй байгаа шалтгаан нь хууль тогтворгүй байгаатай холбоотой юм. Энэ хууль батлагдсан тохиолдолд жинхэнэ хөрөнгө оруулагчид орж ирэх юм уу?

Монгол хүнд 15 жилээр олгодог газрын эрхийг гадны хүнд 100 жилээр ашиглуулах гэж байна. Нэгдсэн үндэсний байгууллагын дүрмээр 80 жил тогтвортой суурьшсан иргэдийг уугуул гэж үздэг. 80 жилийн дараа бид газраасаа хөөгдөх эрсдэлд орох юм биш үү. Израилийн мөнгө хүүлэгчид 1900-аад оноос Палестины газрыг худалдан авч, түрээсэлж эхэлсэн. Одоо газар нутгийн 20 хувь дээр уугуул иргэд дайнд нэрвэгдэн амьдарч байна. Үүнийг бид давтах гээд байна.

Юундаа эгдүүцээд байгаа юм та нар. Ямар ашиг сонирхол байгаа юм. Би үгээ хэлэх эрхтэй.

Малчид малаа хариулах боломжгүй болж байна. Сошиалд та нар харж байгаа биз дээ. Гадны хөрөнгө оруулагчид малчинг бэлчээрээс нь хөөх байдал дээрээ тулчихаад байна. Ч.Хүрэлбаатар сайд та энэ хуулиа татаад авчих.

УИХ-ын гишүүн Ч.Хүрэлбаатар: 

-Монгол Улсын хөгжлийн хамгийн чухал алхам бол хөрөнгө оруулалт. Өмнөх алдаагаа засаад л шийдээд явж байна. Ганц жишээ хэлье. Бирж гэдэг ганцхан үг. 80 ам.доллар байсан бүтээгдэхүүн 180 ам.доллар болж байна. Энэ хууль хоёр жил дуншиж байж хэрэгжиж эхэлсэн. Одоо үр өгөөжөө өгөөд л явж байна.

Газрыг гадаадын иргэдэд ашиглуулах хуулийн заалт 30 жилийн өмнө байсан. Гэтэл өнөөдөр олж хараад улсаа зарах гэж байна гэж үлгэр зохиож байна. Их үнэмшилтэй, уйлж ярьж байна. Тэрбум тэрбум төгрөгөөр монголчуудаа хагалган бутаргаж, иргэдээ доромжилсоор байна. Монгол Улсын хөгжлөө хэдэн арван жилээр хойш татсан бүлэг хүмүүсийн гар хөл энэ хуулийг харлуулж байна.

Танкны үлгэрээ ярьсаар байна. Монголчуудын сэтгэл, гэрэлт ирээдүйг харлуулж чадахгүй гэдгийг хэлмээр байна. Өнөөдөр энэ хуулиа хэлэлцээд явах хэрэгтэй гэв. 

---