Энэ жил 140 хүүхэд хавдраар оношлогдож бүртгэгдсэн байна. Үүний шалтгаан нь хүнд металл элементүүд гэж Анагаах ухааны доктор Н.Одонгуа хэлэв.

Анагаах ухааны доктор Н.Одонгуа:

-Агаар орчны аюулгүй байдлыг сайжруулах үндэсний хөтөлбөр 2017 онд анх батлагдсанаас хойш долоо дахь жилдээ орж байна. 2024-2025 онд уг үндэсний хөтөлбөр дуусна. Хөтөлбөрт тусгасан шалгуур үзүүлэлтийн дагуу нэг ч үзүүлэлт сайжраагүй.

Сайжруулсан түлшинд агуулагдаж байгаа хар тугалга зэрэг хүнд металлын улмаас нас баралт, өвчлөл нэмэгдэж байна. Ялангуяа, бага насны хүүхдийн цусны хавдар ихэссэн. Энэ жил шинээр 140 хүүхэд хавдраар оношлогдож бүртгэгдсэн. Шалтгаан нь хүнд металл элементүүд байдаг.

Эрүүл мэндийн салбар дангаараа энэ өвчлөл, нас баралтыг бууруулах боломжгүй. 2023 оны арваннэгдүгээр сарын байдлаар 91 хүн угаартаж нас барсан. Энэ мэдээллүүдийг ил болгоогүй байна.

Сүүлийн 2017 онд 27 хүн, 2018 онд 44, 2019 онд 40, 2020 онд 86, 2021 онд 135, 2022 онд 103 хүн гэртээ унтаж байгаад угаартсан. Харин эмнэлэгт ирээд эмчилгээ авчихаад гэртээ хариад нас барсан хүмүүсийг угаартсан гэж авч үздэггүй гэв. 

 

---