Нүүрсний сонсголын эхний шатны сонсгол өнөөдөр хоёр дахь өдрөө Төрийн ордонд үргэлжилж байна. Өнөөдрийн сонсголоор газар олголт, Тавантолгой ХК-ийн нүүрс олборлолтын үйл ажиллагаа, тус компанид эрх бүхий байгууллагуудаас хийсэн хяналт шалгалт тэдгээрийн үр дүнд авсан арга хэмжээг сонсож байна.

УИХ-ын гишүүн асан “Ажнай” Д.Бат-Эрдэнэ нь “Тавантолгой” ХК-ийн Төлөөлөн удирдах зөвлөлийн даргаар ажиллаж байхдаа өөрийн хувийн компанидаа хямд үнээр нүүрс худалдаж, тэрхүү нүүрсээ БНХАУ-д өндөр үнэтэй борлуулж, албан тушаалын давуу байдлаа ашиглан “Тавантолгой” компанийн нүүрсний үнийг бууруулсан, хохирол учруулсан гэдэг асуудал хөндөгдлөө. “Ажнай” Д.Бат-Эрдэнэ нарт 2013 онд эрүүгийн хэрэг үүсгэн шалгасан ч прокурорын байгууллага хэрэгсэхгүй болгосон байна. Энэ асуудалтай холбогдуулан Ерөнхий прокурор асан Д.Дорлигжав биечлэн ирж гэрчээр оролцлоо.
Учир нь “Ажнай” Д.Бат-Эрдэнэ нарын хэргийг Д.Дорлигжав Ерөнхий прокуророор ажиллаж байхдаа хэрэгсэхгүй болгож, хариуд нь Монгол Улсын Ерөнхийлөгч асан Ц.Элбэгдорж, Д.Дорлигжав нарын нэгдмэл ашиг сонирхол бүхий "Женерал тех"  компани “Тавантолгой” ХК-тай 2013 онд 100 мянган тонн нүүрс нийлүүлэх гэрээ байгуулсан гэдэг асуудал хөндөгдлөө.    

Хууль зүйн сайд Б.Энхбаяр: -Д.Дорлигжав прокурортой нэгдмэл сонирхолтой Ц.Элбэгдорж нь тухайн үед Монгол Улсын Ерөнхийлөгч байсан. "Женерал тех" компани нь 2013 оны арваннэгдүгээр сард “Тавантолгой” ХК-тай нүүрс нийлүүлэх гэрээ байгуулсан байдаг. Яг тэр цаг үед дээрх хэрэг хэрэгсэхгүй болсон байна гэлээ.

Энэ асуудалд Ерөнхий прокурор асан Д.Дорлигжав хариулт өглөө.

Ерөнхий прокурор асан Д.Дорлигжав: 

-Намайг ерөнхий прокуророор ажиллаж байхад надад танилцуулагдаагүй хэрэг байна. Гаалийн шинжээчийн дүгнэлтийг үндэслэж, Нийслэлийн прокурорын байгууллага хэрэгсэхгүй болгосон юм байна.
Нэг зүйлийг хэлэхэд, хэрэгт хяналт тавьж байгаа прокурор хэний ч нөлөөнд авталгүй, хэргийг шийдэж, өөрөө хариуцлага хүлээдэг хуультай. Гэтэл та /Өмнөговь аймгийн ИТХ-ын төлөөлөгч Х.Сугир мөн энэ талаар мэдээлэл хийсэн/ “Д.Дорлигжав энэ хэргийг хэрэгсэхгүй болгосон” гэж хэвлэл мэдээллийн байгууллагаар өмнө нь ярьсан. Та улс төржих гэж байгаа бол улс төрж. Хэрэг шийдүүлэх гэж байгаа бол хэрэг шийдүүл. Гэтэл аль нь ч биш болгоод хаячихаж байгаа байхгүй юу гэв. 

---