Зариг сайтын Монголоос хандах хандалтыг хаасан асуудалдаа ХХЗХ тайлбар хийлээ.

ХХЗХ-ны хуульч:

-Тус сайтын хандалтыг хязгаарлах жагсаалтад оруулсантай холбоотойгоор олон нийт тайлбар мэдээлэл өгөөч гэх хүсэлт ирсэн. ХХЗХ нь Харилцаа холбооны хуулийн 9.1.14 дэхь заалт, домайн нэр ашиглах журмын 6 дугаар зүйлийн дагуу холбогдох эрх бүхий байгууллагаас ирүүлсэн дүгнэлт шийдвэрийг үндэслэн уг зөрчилтэй домайн нэрийг хязгаарлах шийдвэрийг гаргасан.

СХД-ийн прокурорын газрын 2023.12.01-ний өдрийн 116 тоот прокурорын зөвшөөрөл, ЦЕГ-ын Мөрдөн байцаах албаны 2023.12.01-ний өдрийн 9/6 шийдвэрийг үндэслэн Зариг сайтын хандалтыг зөрчилтэй жагсаалтад оруулсан. Ямар үндэслэлээр хязгаарлах шийдвэр гаргасныг холбогдох хууль хяналтын байгууллагаас тодруулах нь зүйтэй. Хороо бол мөрдөн байцаагчийн шийдвэрийг үндэслэж л арга хэмжээ авсан. 

Мөрдөн байцаагийн дүгнэлтэд бусдын 56 малыг хулгайлсан гэх хэрэгт нөлөөлсөн тул тус сайтыг хэрэг мөрдөж байх хугацаанд хязгаарлаж өгнө үү гэж хүссэн байна. Мөн ЦЕГ-ын шийдвэр ирсэн тул бид шийдвэрээ гаргасан. Эрх бүхий байгууллагаас зөрчил арилсан гэж үзвэл бид тус сайтыг нээнэ. 

ХХЗХ дангаараа, санал санаачлагаараа аливаа домайн нэрний хандалтыг хязгаарладаггүй, хууль эрхзүйн байгууллагын шийдвэрийг үндэслэн технологийн дэмжлэг үзүүлдэг. "Боломжгүй" гэж хэлэх эрх байхгүй, хэрэгжүүлэх л үүрэгтэй. 

Энэ зохицуулалт 2013 оноос хэрэгжиж, өнөөдрийн байдлаар 6183 зөрчлийг хязгаарласан. Үүний 80 хувь нь мөрийтэй тоглоом, садар самуун сурталчлах, оюуны өмч хулгайлах зэрэг зөрчлүүд байна. 

Эх сурвалж: MPA, ХХЗХ

 

---