АТГ-аас "Ногоон автобус"ны хэрэгт холбоотойгоор сайд асан Ж.Сүхбаатарт эрүүгийн хэрэг үүсгэж, яллагдагчаар татах саналыг нийслэлийн прокурорт хүргүүлжээ. Одоогоор прокурорын яллагдагчаар татсан тогтоол гараагүй байгаа аж.

Энэ талаар АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн:

-Албан тушаалын байдлаа урвуулан ашиглаж, бусдад давуу байдал бий болгосон байж болзошгүй гэх үндэслэлээр сайд асан Ж.Сүхбаатарт эрүүгийн хэрэг үүсгэж, яллагдагчаар татах саналыг Нийслэлийн прокурорын газарт хүргүүлсэн байгаа. 

Хотын дарга асан Д.Сумъяабазарыг яллагдагчаар татах санал мөрдөгчийн зүгээс гаргаагүй байна. Гэсэн ч мөрдөн шалгах ажиллагаа явагдаж байна.

Автобусны хэрэгт холбогдуулан 26 хүнийг яллагдагчаар татсан байгаа. Үүнд нийтийн албан тушаалтан 18, гадаад улсын иргэн дөрөв, хуулийн этгээд дөрөв байна гэлээ. 

---