Гадаадын тагнуулын байгууллага, иргэнтэй хууль бусаар хамтран ажилласан хэрэгт буруутгагдсан яруу найрагч, Соёлын гавьяат зүтгэлтэн Ц.Хулан, Сажа Бандидын номын хүрдэн хийдийн тэргүүн Б.Отгонбаатар нарын гомдлыг нийслэлийн Эрүүгийн хэргийн давж заалдах шатны шүүх хоёр хоногийн өмнө хаалттай хэлэлцсэн. 

Давж заалдах шатны шүүхээс Ц.Хуланг гэм буруутайд тооцон ял оноосон нь үндэслэлтэй гэж дүгнэсэн ч 9.6 жилийн хорих ялыг нь 8.1 жил болгон бууруулж, харин Б.Отгонбаатарыг хууль сахиулах байгууллагатай хамтран ажилласан гэж үзээд эрүүгийн хариуцлагаас чөлөөлсөн юм.

Энэ асуудлаар Ц.Хулангийн өмгөөлөгч Ц.Оюунбаатартай холбогдоход “Гадагшаа хүн рүү захидал илгээснийх нь төлөө эх орноосоо урвасан, гадаадын тагнуулын байгууллагатай хамтран ажилласан гэж буруутгаж болохгүй. Улсын Дээд шүүхэд хандана. Түүнчлэн Олон улсын хүний эрхийн байгууллагад ч хандана” гэв. 

---