Гадаадын тагнуулын байгууллага, иргэнтэй хууль бусаар хамтран ажилласан хэрэгт холбогдон Сүхбаатар дүүргийн Эрүүгийн хэргийн анхан шатны шүүхээс ял сонсон хоригдож буй яруу найрагч, Соёлын гавьяат зүтгэлтэн Ц.Хулан, Сажа Бандидын номын хүрдэн хийдийн тэргүүн Б.Отгонбаатар нарын гомдлыг нийслэлийн Эрүүгийн хэргийн давж заалдах шатны шүүх өчигдөр хаалттай хэлэлцлээ.

Өмнө нь хоёр ч удаа хэлэлцэхээр товлосон ч Ц.Хулан өмгөөлөгчөө сольж, шинээр хоёр ч хуульчаар эрхээ хамгаалуулахаар болсонтой холбоотойгоор хойшлуулаад байсан юм. Анхан шатны шүүхээс Ц.Хуланг Эрүүгийн хуулийн 19.4-1 дэх хэсгийн “Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан” гэмт хэрэгт гүйцэтгэгчээр хамтран оролцсон гэм буруутайд тооцож, есөн жил зургаан сарын хугацаагаар хорих ял оноосон. Б.Отгонбаатарыг уг хэрэгт хамжигчаар хамтран оролцсон гэм буруутай гэж дүгнэн найман жилийн хорих ялыг нээлттэй хорих байгууллагад эдлүүлэхээр шийдвэрлэснийг бид цаг тухайд нь мэдээлж байсан.

Мөн гэмт үйлдлийн замаар гадаадын буюу өмнөд хөршийн тусгай албаны ажилтнуудаас 238.6 сая гаруй төгрөг авсан болох нь шүүхийн хэлэлцүүлийн явцад тогтоогдсон гэж үзээд Ц.Хулангаас 159.7 сая, Б.Отгонбаатараас 78.9 саяыг албадан гаргуулж улсын төсөвт шилжүүлэхээр шийдвэрлэсэн юм. Харин давж заалдах шатны шүүхийн шүүгч О.Чулуунцэцэг даргалан, Л.Дарьсүрэн, илтгэгч шүүгч М.Алдар нар, улсын яллагч, Ц.Хулангийн өмгөөлөгч Ц.Оюунбаатар, Ч.Өнөржаргал, Ж.Батхуяг, Б.Отгонбаатарын өмгөөлөгч Ц.Одмаа, Д.Дүгэржав нарыг оролцуулан 11.45 цагийн үед хэлэлцэж эхэлсэн.

Шүүх хурал 20.15 цагийн үед завсарлаж, шүүгч нар цаг гаруйн турш зөвлөлдсөний эцэст өчигдөр 21.30 цагийн үед магадлалаа танилцуулсан юм. Ингэхдээ Ц.Хуланг гэм буруутайд тооцон ял оноосон нь үндэслэлтэй гэж дүгнэсэн ч хорих ялыг нь найман жил нэг сар болгон багасгав. Харин Б.Отгонбаатарыг хууль сахиулах байгууллагатай хамтран ажилласан гэж үзээд эрүүгийн хариуцлагаас чөлөөлжээ.

---