Монголын үндэсний допингийн эсрэг байгууллагын удирдлагуудыг эрх мэдэл, албан тушаалын байдлаа урвуулан ашиглаж, бөхчүүдийн допингийн шинжилгээний хариуг өөрчилдөг байж болзошгүй хэмээн АТГ-аас шалгаж буй юм. Дээрх асуудал үүссэнтэй холбогдуулан Улсын арслан М.Бадарчийн байр суурийг сонслоо. Тэрбээр Ардын хувьсгалын 102 жилийн ой, Үндэсний их баяр наадмын хүчит бөхийн барилдаанд 9 даван түрүүлсэн ч допингийн шинжилгээнд бүдэрсэн. Гэвч Улсын арслан М.Бадарч допинг хэрэглээгүй хэмээн тайлбар хийж буй.

-Монголын үндэсний допингийн эсрэг байгууллагын удирдлагууд бөхчүүдийн допингийн шинжилгээний хариуг сольдог байж болзошгүй асуудлаар хуулийн байгууллагад шалгагдаж эхэллээ. Та энэ асуудалд ямар байр суурьтай байна вэ?

-Хууль хүчний байгууллага цаад талын “но”-г нь илрүүлчих шиг боллоо. Допингийн эсрэг төвийнхөн ямар алдаатай үйл ажиллагаа явуулж байсныг нь мэдчих шиг боллоо гэж бодож байна. Өөр хэлэх зүйл алга.

-Та допинг хэрэглээгүй гэдэг байр суурин дээрээ байгаа юу?

-Би өөрийгөө 100 хувь мэднэ. Хүн өөрөө өөрийгөө 100 хувь мэддэг байхгүй юу.

-Та допинг хэрэглээгүй гэдэг байр суурин дээрээ хатуу байгаа бол хэвлэлийн бага хурал зарлаад олон нийтэд дэлгэрэнгүй мэдээлэл өгч болохгүй юм уу?

-Би допинг хэрэглээгүй гэдэг байр сууриа илэрхийлж байгаа шүү дээ. Хуулийн байгууллага шалгаж байхад би олон зүйл ярих нь дэмий байх. 

---