Ардын хувьсгалын 102 жилийн ойн түрүү бөх, Улсын арслан М.Бадарч өчигдөр осолд орсон харамсалтай хэрэг гарсан. Тэрбээр ойр дотны хүмүүстээ "Сэтгэл тавгүй байна. Агаар амьсгалаад ирье" гэж гараад Богд уулнаас дөрвөн дугуйттайгаа олон удаа өнхөрч, гэмтсэн талаар бид өчигдөр мэдээлсэн.

Улсын арслан М.Бадарчийн найз А.Баярбат "Өдрийн сонин"-д "Эрүүл мэнд нь тодорхой бус байна. Гар нь хоёр газраараа хугарч, үйрсэн. Дотор битүү доргилттой гэж эмч хэлсэн. Нүүр ам нь зулгарч, танигдахын аргагүй хүнд гэмтэл авсан. Одоогоор нурууны MRI авахуулсан" гэжээ.

Авто осолд орсон улсын арслан М.Бадарч өдгөө ГССҮТ-ийн Гар сарвуу нөхөн сэргээх бичил мэс заслын тасагт хэвтэн эмчлүүлж байгаа аж. "Үйлчлүүлэгчийн биеийн байдал тогтвортой. Гарын шууны хугаралд мэс засал эмчилгээ хийж байна" хэмээн ГССҮТ-өөс мэдээллээ. 

---