Монгол Улсын газар зүйн онцлог, газар нутгийн хэмжээнээс шалтгаалан алслагдсан бүс нутаг, сум бүрийг өндөр хурдны интернет сүлжээнд холбох боломж хомсоос гадна өндөр зардалтай. Үүнээс улбаалан алслагдсан аймгийн сумдууд байнгын өндөр хурдны интернетэд холбогдох боломж хомс байдгаас үүдэн боловсролын тэгш хүртээмж алдагдах эрсдэлтэй байдаг. 

Орчин цагийн боловсрол, хүний хөгжлийг интернетгүйгээр төсөөлөх аргагүй, хувь хүний хөгжил цаашлаад дэлхийтэй хөл нийлүүлж алхахад дэмжлэг болох, онлайн сургалтад хамрагдах нь боловсролын тэгш хүртээмжийг нэмэгдүүлэх үндсэн арга замуудын нэг юм. Тэгвэл дэлхийн аль ч хэсгээс нам орбитын хиймэл дагуул ашиглан өндөр хурдны интернетэд холбогдох боломжтой “Starlink” төхөөрөмжийг Говь-Алтай аймгийн 18 сумын Ерөнхий боловсролын сургуульд Соёлын сайд Ч.Номин гэр бүлийнхээ зүгээс гардуулсан байна.

“Starlink” төхөөрөмж нь Говь-Алтай аймгийн 18 сумдын ЕБС-ийн боловсролын чанар, хүртээмжийг нэмэгдүүлж сурган хүмүүжүүлэгч нар болон сурагч багачуудын ирээдүйд үнэтэй хувь нэмэр оруулна.

---