УИХ-ын гишүүн, УИХ-ын дэд дарга С.Одонтуяа сайжруулсан түлшнээс болж угаартаж нас барсан, хордсон иргэдийн асуудлаар болон улсын нэр хүндийг гутааж, эмэгтэй хүнд хүндэтгэлгүй хандсан хэргийн тухай асуудлаар мэдээлэл өглөө.

УИХ-ын гишүүн С.Одонтуяа:

-Тавдугаар сарын 31-ний шөнө 25 хүн угаартаж, найман хүн нас барсан мэдээлэл хэвлэл мэдээллээр явж байгаа. Энэ мэдээллийг бид НЭМҮТ-ийн Г.Номуунтуул мэргэжилтний ярилцлагаас авсан.

Хачирхалтай нь ийм хэрэг гарчихаад байхад өнөөдөр иргэд албан ёсны газруудаас мэдээлэл авах боломж алга. Бүх газар ярилцлага өгөхөөс татгалзаж байна. Би УИХ-ын дэд даргын хувьд мэдээлэл авах гээд мэдээлэл олдохгүй байна. Буруу мэдээлэл өгч байна. Нас барсан найман хүнээс гурав нь бага насны хүүхэд байсан гэх мэдээлэл явж байгаа.

Иймд холбогдох байгууллагуудыг ард түмнийхээ өмнө гарч ирээд үнэн зөв мэдээлэл өгөөч гэж хүсэлт гаргаж байна. Шахмал түлшний асуудал иргэдийн дунд бухимдал түрүүлж байна. Он гарснаас хойш 1,739 хүн угаартаж, 46 хүн нас барсан байна. МАН-аас нэг ч хүн энэ асуудлаар дугарахгүй байгаа. Шахмал түлшинд угаартаж нас барсан хүмүүсийн асуудлаар мэдээлэл өгсөн мэргэжилтнүүдийг айлгаж, сүрдүүлж байна. Тиймээс уг асуудлыг орхихгүй ярина. УИХ-д Агаарын бохирдлын дэд хороо бий. Гэтэл энэ асуудлаар дуугарахгүй байна. 

Мөн Сэлэнгэ аймгийн Мандал сумын Засаг даргын орлогч Л.Мөнхбат гэх нөхрийн үйлдсэн бузар гэмт хэрэг бол олон улсад Монгол Улсын нэр хүндийг унагасан үйлдэл. Тиймээс бид энэ асуудлыг орхихгүй. Хэн дуртай дарга нь гадаадад очоод Монгол Улсын нэрийг гутааж байдаг. Хэн дуртай дарга нь хүчирхийлэл үйлддэг байдлыг бид хүлээн зөвшөөрөхгүй гэлээ. 

НИТХ-ын төлөөлөгч Д.Энхтуяа:

-Жил бүр шахмал түлшнээс болж, олон хүн амь насаа алддаг. Түүнчлэн гэр хорооллыг барилгажуулах, агаарын бохирдлыг бууруулахад татвар төлөгчдийн мөнгөнөөс их хэмжээний мөнгө төсөвлөдөг. Тухайлбал, 2021 онд 30.2 тэрбум төгрөг, 2022 онд 34.5 тэрбум төгрөг, энэ жилийн тухайд 39.4 тэрбум төгрөг төсөвлөсөн. Нэг үгээр хэлбэл жил бүр өссөн дүнтэй төсөв баталдаг. Гэтэл одоог хүртэл иргэд утаагүй түлшнээс болж, амь насаа алдсаар байна гэв.

---