СПОРТ
ХӨГЖИМ
™ watch

“Жаст групп”-ийн Ш.Батхүүгээс гаргуулах хохирлыг шүүх үл хэрэгсэв

Нийтэлсэн
11 сарын өмнө


Сурталчилгаа
Нийтэлсэн:   Г.Равжаа
11 сарын өмнө

Төрийн өмчит “Эрдэнэт үйлдвэр”-ийг Өмнөд Африкийн “Стандарт банк” (Standart bank PLC)-анд барьцаалан нийт 160.1 сая ам.долларын зээл авсан хэрэгт буруутгагдсан “Жаст групп” ХХК-ийн захирал Ш.Батхүү тэргүүтэнд холбогдох хэргийг нийслэлийн Эрүүгийн хэргийн давж заалдах шатны шүүхэд энэ сарын 14, 15-нд хэлэлцэн шийдвэрлэлээ.

Хан-Уул дүүргийн Эрүүгийн хэргийн анхан шатны шүүх уг хэргийг өнгөрсөн оны арваннэгдүгээр сард хэлэлцэн шийтгэх тогтоолоо гаргаж байсныг бид цаг тухайд нь мэдээлсэн билээ. Түүнтэй хамт “Эрдэнэт үйлдвэр”-ийн ерөнхий захирлын албыг 2007-2013 онд хашсан асан Ч.Ганзориг, тус үйлдвэрийн Хуулийн хэлтсийн дарга асан, өдгөө “Коконат ойл” компанийн захирал албан тушаалтай Б.Мөнхжаргал, тус үйлдвэрийн Худалдааны хэлтсийн даргаар ажиллаж байсан Г.Амарбат, “Алтжин групп”-ийн захирал агсан Г.Алтангийн хүү Э.Сүрэн нарыг гэм буруутайд тооцсон билээ. Улмаар Ш.Батхүүд 10 жил хорих ял шийтгэж, “Эрдэнэт үйлдвэр”-т учруулсан 105 тэрбум, бусад аж ахуйн нэгжид учруулсан дөрвөн тэрбум гээд нийт 109 тэрбум төгрөгийг гаргуулан хохирогчоор тогтоогдсон аж ахуйн нэгжүүдэд олгохоор болсон юм. Мөн Ч.Ганзориг, Б.Мөнхжаргал нараас дээрх үйлдвэрт учирсан хоёр тэрбум төгрөгийн хохирлыг гаргуулахаар болсон бөгөөд шүүх тэдэнд 14 сая төгрөгөөр торгох ял оноосон. Ш.Батхүүтэй хамтарч хуурамч бичиг баримтаар Төрийн банкийг хохироосон гэм буруутай нь тогтоогдсон Э.Сүрэнд 35 сая төгрөгөөр торгох ял шийтгэсэн.

Тэгвэл нийслэлийн Эрүүгийн хэргийн давж заалдах шатны шүүх уг хэргийг хэлэлцээд шүүгдэгч Б.Мөнхжаргал, Э.Сүрэн, Г.Алтан нарт холбогдох хэргийг хэрэгсэхгүй болгож, хохирол төлбөрт “Жаст групп” компаниас гаргуулахаар “Эрдэнэт үйлдвэр”-ээс нэхэмжилсэн 30 гаруй тэрбум төгрөгийн нэхэмжлэлийг үл хэрэгссэн байна. Өөрөөр хэлбэл, төрд учирсан хохирлыг анхан болон давж заалдах шатны шүүх үл ойшоогоод зогсохгүй, анхан шатны шүүхээс гэм буруутайд тооцсон хүмүүсийг ч цагаатгажээ. Үүнээс үзэхэд төрийн өмчит аж ахуйн нэгжид учирсан хохирол цаашид ч төлөгдөхгүй, татвар төлөгч иргэд, аж ахуйн нэгжүүдийн улсад тушаасан мөнгийг олон улсын арбитрын шүүхийн маргаанд зарцуулсан төлбөрт өгч барагдуулах бололтой.

Уг нь анхан шатны шүүхээс Ш.Батхүүд 10 жил хорих ял шийтгэж, “Эрдэнэт үйлдвэр”-т учруулсан 105 тэрбум, бусад аж ахуйн нэгжийн дөрвөн тэрбум гээд нийт 109 тэрбум төгрөг гаргуулан хохирогчдод олгохоор болоод байсан. Мөн гэм буруутай гэж анхан шатны шүүх дүгнэсэн Ч.Ганзориг, Б.Мөнхжаргал нараас “Эрдэнэт үйлдвэр”-т учирсан хоёр тэрбум төгрөгийн хохирлыг гаргуулж, 14 сая төгрөгөөр торгох ял оноосон билээ. Ш.Батхүүтэй хамтарч хуурамч бичиг баримтаар Төрийн банкийг хохироосон гэм буруутай нь тогтоогдсон Э.Сүрэнд 35 сая төгрөгөөр торгох ял шийтгээд байсныг нийслэлийн Эрүүгийн хэргийн давж заалдах шатны шүүхийн шүүгч М.Алдар даргалж, шүүгч Ш.Бат-Эрдэнэ, Г.Есөн-Эрдэнэ нарын бүрэлдэхүүнтэй хэлэлцсэн хурлаас ийнхүү шийдвэрлэсэн нь хачирхалтай.

Сурталчилгаа

Манай хуудсыг дагаарай!


Сэтгэгдэл (1)

Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй
байж, өөрийн болоод хүний үзэл бодлыг хүндэтгэнэ үү.

zochin
11 сарын өмнө
66.181.160.49

Hurelsuh Erunhiilugch uu ene hahuuli abaad buruu shuugeed bga shuugch naraa solioch ee. Ulsiin hohiroliih hen baragduulah yum,shuugch nar uu

© 2019 livetv.mn. Бүх эрх хуулиар хамгаалагдсан.
Мэдээлэл хуулбарлах хориотой.