ГССҮТ-д бага насны хүүхэд биедээ ил харагдах гэмтэлтэй, ухаангүй байдалтай энэ сарын 08-ны өдөр иржээ. Тус эмнэлгээс хүүхдийн талаарх мэдээллийг цагдаагийн байгууллагад хүргүүлсэн бөгөөд уг хэргийг шалгаж эхэлсэн байна.  Шалгалтын явцад гурван настай эрэгтэй хүүхдийг төрсөн эх нь хамтран амьдрагчийн хамт эмнэлэгт хүргэсэн. Улмаар эхийнх нь хамтран амьдрагч 34 настай эрэгтэй Э хүүг эмнэлэгт хүргэсний дараа зугтжээ. 

Цагдаагийн байгууллагаас хамтран амьдрагч 34 настай эрэгтэйг саатуулан шалгаж эхэлжээ. Хүүгийн биеийн байдлын талаар ГССҮТ-өөс дараах мэдээллийг өглөө.

ГССҮТ-ийн эмчилгээ эрхэлсэн захирал Р.Гантуяа:

-ГССҮТ-д гуравдугаар сарын 08-ны 09 цаг 40 минутад шалтгаан тодорхойгүй, биеийн байдал маш хүнд гурван настай хүүхэд хүргэгдэж ирсэн.
Хүлээн авах тасаг яаралтай үзлэг шинжилгээ хийхэд хавсарсан хүнд гэмтэл, зөөлөн эдийн няцрал ихтэй, сээр нурууны гуравдугаар нугалмын их биеийн хугаралтай, баруун шууны хугаралтай, тархины хүнд гэмтлийн зэрэг тогтоогдсон.

Хүүхэд эрчимт эмчилгээний тасагт хоёр дахь өдрөө эмчлэгдэж байна. Хүүхдийн шулуун гэдэсний орчим зөөлөн эдийн няцрал ихтэй байсан. Амьсгал зүрх судасны дэмжлэгтэй эмчлэгдэж байна.

Бага насны хүүхдүүд гэр бүлийн хүчирхийлэлд өртөж, ГССҮТ-д ирэх нь ихсэж байна. Эмчийн анхан шатны үзлэгээс зодуулсан байх магадлалтай гэж үзэж байна гэлээ.

---