СПОРТ
ХӨГЖИМ
™ watch

Хятадын иргэд: Хил нээгдсэн ч бид гадаад руу аялахгүй

Нийтэлсэн
1 сарын өмнө


Сурталчилгаа
Нийтэлсэн:   Admin
1 сарын өмнө

Өнгөрсөн гурван жилийн хугацаанд COVID-19 халдварын тархалтыг бууруулахын тулд БНХАУ маш хатуу бодлого баримталсан билээ. Үүнийг тэвчсэн иргэдийн бухимдал эцсээ хүрч саяхан томоохон хэмжээний эсэргүүцлийн жагсаал зохион байгуулсны үр дүнд хөл хорионы дэглэмийг сулруулаад байна.

Тодруулбал, халдварын шинж тэмдэг илэрсэн тохиолдолд гэртээ тусгаарлагдах боломжийг олгох, бүх нийтийн шинжилгээг цуцлах гэсэн шийдвэрүүдийг Хятадын Засгийн газар энэ сарын эхээр гаргасан билээ. Үүнд Хятадын иргэд баяртай байна.

Энэ талаар Хэбэй мужийн бизнес эрхлэгч, 36 настай Жоу Жинь “Халдвар авсан ч гэр бүлийнхэнтэйгээ хамт тусгаарлагдана гэдэг надад үнэхээр сайхан байна. Мөн дэлгүүр орохдоо хэн нэгнээс зөвшөөрөл авахгүй сайхан өдөр удахгүй ирнэ гэдэг итгэлтэй байна. Одоогийн омикрон хувилбар илүү аюултай санагдсан. Тиймээс гадаад руу аялах шийдвэрээ цуцалсан” хэмээн “Aljazeera”-д ярьжээ. Мөн Тяньжинд жижиглэнгийн бизнес эрхлэгч Лили Жан “Олон улсын хэрэглэгч болон бизнес түншүүдтэйгээ хэлэлцээр хийхээр ирэх оноос гадаад руу явахад бэлэн. Гэхдээ гэр бүлийнхэнтэй хамт явахгүй. Учир нь гадаадад очоод COVID-19 халдвар авахгүй гэсэн баталгаа байхгүй. Тиймээс хүүхдүүдийнхээ эрүүл мэндийн төлөө би хариуцлагатай байх ёстой” гэж ярьсан байна.

“Oliver Wyman” хэмээх компанийн 4000 хүнийг оролцуулсан судалгаагаар оролцогчдын талаас илүү хувь нь “Хил маргааш нээгдсэн ч халдварын тархалтаас айгаад гадаад руу явахаа хойшлуулсан” хэмээн хариулсан байна. Энэ судалгаа нь Хятадын иргэд ямар их сэрэмжтэй болсны илрэл хэмээн ажиглагчид үзэж байна.

Гэхдээ халдвар тархахаас өмнө буюу 2018 онд Хятадууд олон улсын аялалд 288 тэрбум ам.доллар зарцуулсан нь дэлхийн нийт аялал жуулчлалын зардлын дөрөвний нэгийг эзэлж байгаа юм. Тиймээс аяллаа хойшлуулна гэдэг дэлхийн аялал жуулчлалын зах зээлийн хувьд тийм ч таатай мэдээ биш юм.

Б.ДОЛЖИНЖАВ 

Эх сурвалж: "Зууны мэдээ" сонин

2022 ОНЫ АРВАНХОЁРДУГААР САРЫН 20. МЯГМАР ГАРАГ. № 246 (6978)

Сурталчилгаа

Манай хуудсыг дагаарай!


Сэтгэгдэл (0)

Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй
байж, өөрийн болоод хүний үзэл бодлыг хүндэтгэнэ үү.

© 2019 livetv.mn. Бүх эрх хуулиар хамгаалагдсан.
Мэдээлэл хуулбарлах хориотой.