Нүүрсний хууль бус наймаа хийдэг компанитай улс төрчдийн жагсаалтад УИХ-ын гишүүн Ц.Цэрэнпунцагийн нэр дурдагдсан. Түүнээс уг асуудлыг тодрууллаа.

УИХ-ын гишүүн Ц.Цэрэнпунцаг: 

-Нүүрс тээвэрлэдэг нэг компанийн захирлаар ажилладаг С.Жаргалсайхан гэж хүнтэй би өмнө нь хамтарч ажилладаг байсан нь үнэн. "Витафит" компанийн захирал С.Жаргалсайхан манай Пепси брэндийг үйлдвэрлэж, савладаг компанийн 50 хувийг эзэмшдэг байж байгаад жилийн өмнө компаниас гарсан. Одоо тус компанийн хөрөнгө оруулагч нь манайх дангаараа байгаа. Ийм л холбоотой хүн. Одоо нүүрс тээврийн компани ажиллуулж байгаа эсэхийг ч би мэдэхгүй. 

Миний хувь эзэмшдэг, Австралийн хөрөнгө оруулалттай, нээлттэй компани болох "Аспайр майнинг" ХХК нэг ч хүрз нүүрс гаргаагүй. Үйл ажиллагаа явуулаагүй зогссон байгаа. Тэгэхээр би яаж энэ асуудалд холбоотой байх вэ дээ. 

Нүүрсний хулгай бол төрийн эзэмшилтэй компаниуд дээр байгаа асуудал. Хувийн компани яриад байгаа бол тэр нь татварын асуудал байгаа байх. Хүн өөрийнхөө өмчөөс хулгайлна гэж байх уу. Нүүрсний хувьцаа эзэмшигч нарыг буруутгах гэж байгаа бол 1072 хувьцаа эзэмшдэг Монголын ард түмэн буруудах уу? 

Хэвлэлийнхний тавьсан нэрсийн жагсаалтын тэргүүнд би байгаа бол юу ч хэлэх вэ дээ. Нүүрсний хулгайч нарын тэргүүнд би байгаа бол Монголд огт нүүрсний хулгайч байхгүй гэлээ. 

---