Монгол улсын Ерөнхий сайдын захирамжаар нүүрсний хулгайг илрүүлж, хариуцлага тооцох ажлын хэсэг байгуулагдлаа. Ажлын хэсэгт цагдаа, авлигатай тэмцэх газар, шүүх, прокурор, гаалийн байгууллагын удирдлагууд  багтжээ. ХЗДХ-ийн сайд Х.Нямбаатар нар сэтгүүлчдийн асуултад товч хариулт өглөө. 

ХЗДХ-ийн сайд Х.Нямбаатар:

-Хэдэн сая тонн нүүрс алга болсон гэдгийг хэн ч мэдэхгүй байна. 40 их наяд төгрөгийн нүүрс алга болсон гэдэг зүйлийг УИХ-ын гишүүн Т.Доржханд л яриад байгаа. Түүнийг гэрчээр дуудаж тайлбар авах шаардлагатай.

Хэн, хэн гэдэг хүн нүүрсийн хэрэгт шалгагдаж байгаа дээр бас хэлэх зүйл алга. Ажнай Б.Бат-Эрдэнэ гэж ярьдаг. УИХ-ын гишүүн Д.Адъяасүрэнгийн нэр яригддаг. Би мөрдөн шалгах ажиллагаанд оролцох эрхгүй хүн учраас энэ талаар мэдэхгүй байна. Гэм хийгээгүй хүнд би хилсээр ял өгч болохгүй шүү дээ.

Нүүрсний хэрэгт шалгагдаж байгаа хүмүүсийн нэрсийг зарлах эсэх дээр прокурорын байгууллагын хүмүүстэй уулзсан. Маргааш зарим мэдээллийг ил болгож магадгүй. 

Оффтейк гэрээ байгуулсан БНХАУ-ын компаниудаас зөвшөөрөл авч байж улсын нууцаас гаргах болчихлоо. ГХЯ энэ тал дээр ажиллаж байгаа. 

Нүүрс тээвэрт явж байгаа 9000 жолоочийн ажилд нь саад болохгүйгээр шалгаж, тээвэрлэж байгаа автомашины эцсийн эзэмшигчийг тодруулах ажил явагдаж байна. Орон нутгийн мөрдөгчдийг оролцуулж байгаа. 

Нийслэлийн ерөнхий прокурор Ц.Ариунболд: 

-Нүүрс тээвэртэй холбоотой 21 хэрэг шалгагдаж байгаа. Найман хэрэгт нь 41 хүнийг яллагдагчаар татсан. 30 гаруй хүний хэрэг шүүхэд шилжээд байгаа. 

Нүүрсний хулгайн хэргийг аль болох богино хугацаанд шалгаж шийдвэрлэнэ. Өргөн бүрэлдэхүүнтэй ажлын хэсэг байгуулагдсан учир цаг наргүй ажиллана. 

Гаалийн ерөнхий газрын дарга Б.Асралт: 

-378 мянган тонн нүүрс алдагдсан байж болзошгүй хэрэг 2018 онд гарсан. 2021 онд арван машин нүүрс алга болсон байж болзошгүй хэрэг гарсан. 

Намайг нүүрсний хулгайн хэрэгт холбоотой, ажлын хэсэгт орж болохгүй гэсэн зүйлийг зарим хүн ярьж байна гэсэн. Би нүүрсний хулгайтай холбоотой ямар ч асуудалд орооцолдоогүй. Хэрэв тийм хардлага байгаа бол би өөрийн хүсэлтээр шалгуулахад бэлэн байна. 

---