Эрдэнэс Тавантолгой ХК-ин бүрэн эрхт төлөөлөгч Ж.Ганбат эрх хүлээн авснаас хойших 35 хоногт хийж гүйцэтгэсэн ажлын тайлангаа тавилаа. Мөн сэтгүүлчид 40 их наядын нүүрсний хулгайн асуудлаар асуулт асуулаа. 

Эрдэнэс Тавантолгой ХК-ин бүрэн эрхт төлөөлөгч Ж.Ганбат: 

-Бүрэн эрхт төлөөлөгчөөр томилогдож ирээд 35 хонож байна. Өнгөрсөн хугацаанд урт тээвэрт 200 автомашин явж байсныг 700 болгож нэмэгдүүллээ. Оргил үедээ 1028 автомашинаар нүүрс зөөсөн.

Эрдэнэс Тавантолгойн өр 603 сая ам.доллар байсныг 152-оор буурууллаа. Одоо 451 сая ам.долларын өр үлдсэн. 603 сая ам.долларын өр бол нүүрс өгнө гэж авсан мөнгө. Нүүрсээ өгнө, компаниудтай тохирсон байгаа. 

-Нүүрсний хулгайн талаар дээр дооргүй ярьж байна. Эрдэнэс Тавантолгойгоос хэдий хэмжээний нүүрс алдагдсан бэ? 

-Хоёр хэрэг байгаа. Нэг нь, 2018 онд 68.3 мянган тонн нүүрсний асуудал. Эрдэнэс Тавантолгой болон Таван толгой компанийн хамтарсан ажлын хэсэг гарсан. Алдагдсаныг тогтоосон. Хууль хяналтын байгууллагаар шалгагдаж байгаа юм билээ. Нөгөө нь, Цагаанхадан дээр гардаг. Нүүрсийг Цагаанхаданл буулгадаг. Буулгасан нүүрсээ цааш нь ачдаг. Тэр хооронд зөрүү гардаг. Энэ асуудал дээр хяналт шалгалтыг сайжруулах асуудал бий. Тэрнээс, хэвлэлээр яриад байгаа шиг 40 их наядын нүүрсний асуудал гэж байхгүй гэв. 

---