Өмнөд Солонгосын Умард Кёнсан мужийн Сонжү хошууны Бёкжин хотод нэг давхар цементэн блокон байшин нурж, дотоод засварын ажил хийж байсан хоёр монгол ажилтан нурангид дарагдсан байна.

Тодруулбал, өнөөдөр буюу арваннэгдүгээр сарын 28-ны өдрийн 15:23 цагийн үед болсон энэ ослын үеэр 40 настай "А" болон 22 настай "Б" нар нурангид дарагдсан аж. Ингээд бүс нутгийн Гал унтраах ангийн 56 хүний бүрэлдэхүүнтэй баг ослын газарт ажиллаж, 23 техник хэрэгслийг ашиглан хоёр хохирогчийг 30 минутын дараа гаргаж авжээ.

Албаныхны мэдээлснээр, нэг ажилчин нь нуранги дороос өөрөө гарч ирж чадсан бол нөгөө иргэнийг гаргаж авахад зүрх нь зогссон байсан бөгөөд яаралтай анхны тусламж үзүүлж сэхээн амьдруулсан байна. Одоо хохирогчдыг эмнэлэгт хүргэсэн бөгөөд тэд хөнгөн, хүндэвтэр гэмтсэн гэжээ.

Гэрчүүдийн хэлснээр, засвар хийж байсан байшингийн ханыг буулгах үед байшин нурсан бөгөөд цагдаа нар ослын шалтгааныг шалгаж байна.

Эх сурвалж: NEWSIS

---