Хөгжлийн Банкны зээлдэгч "Эрэл" ХХК-д холбогдох шүүх хурал өнөөдөр товлогдсон байсан ч дахин хойшилжээ.

Хөгжлийн Банк 2019 онд тус компанийг шүүхэд өгч, 2020 онд хэрэг үүсгэснээс хойш гурван жилийн хугацаанд шүүх хурал нийт 18 дахь удаа хойшилжээ. Учир нь хариуцагч Б.Эрдэнэбат нь шүүх хуралдаанд биечлэн оролцох боломжгүй (гадаадад) тул хурлыг хойшлуулах хүсэлт гаргасан байна. Б.Эрдэнэбат эхнэрийн бие муудсан гэх шалтгаанаар Сингапур улсыг зорьжээ. Шүүгч хүсэлтээс татгалзан хурлыг үргэлжлүүлэхээр шийдвэрлэсэн ч "Эрэл"-ийн өмгөөлөгчид шүүгчээс татгалзах хүсэлт гаргажээ.

"Эрэл" компани нь гэр хорооллыг орон сууцжуулах зорилгоор Хөгжлийн банкнаас гурван удаа зээл авсан байдаг.

Тодруулбал, 

-2013 оны наймдугаар сарын 16-нд 14 сая ам.доллар  
-2014 оны дөрөвдүгээр сарын 28-нд 13.4 сая евро 
-2015 оны арваннэгдүгээр сарын 14-нд 9 сая ам.долларын зээл авсан бөгөөд өнөөдрийг хүртэг нэг ч төгрөг эргэн төлөөгүй байна. Зээл болон хүү, алдангийн дүн өнөөдрийн байдлаар 197 тэрбум төгрөг болжээ.

---