Нийслэлийн тусгай сургалттай 29 дүгээр сургуулийн багш, ажилчдын төлөөлөл хэвлэлд хандлаа. Тэдний зүгээс тус сургуулийн хүүхдүүдийн сурах эрх зөрчигдөх, хичээл заах боломж улам хязгаарлагдмал болсон нь таван жилийн хугацаанд арван захирал солигдсонтой холбоотой гэлээ. Мөн сургуулийн анги, танхим хуучирч, бороо, цас ордог нь сургалтын орчин нөхцөлд яамнаас анхаарал огт тавихгүйгээс гадна 1989 оноос хойш тус сургуульд нэг ч удаагийн урсгал засвар ороогүйтэй холбоотой гэсэн юм. 

29-р сургуулийн математикийн багш Н.Уртнасан:

-Би 29-р сургуульд 21 дэх жилдээ ажиллаж байна. 2022 оны арваннэгдүгээр сарын 17-нд багшийн эрх зөрчигдсөн асуудлаар цахим хуудаст мэдээлэл тавьсан. Анги маш хүйтэн байснаас болж хичээл, сургалт хэвийн үргэлжлэх боломжгүй болсон. Энэ асуудал 2-3 жилийн өмнө нь ч ийм л дүр зурагтай байсан. Тиймээс багш нар цонхны дулаалга өөрсдөө авч засвар хийдэг. Дан ганц хүйтэн гэдэг асуудал ч байгаа юм биш сургуулийн гуравдугаар давхрын 14 анги бүгд усанд автдаг. Бороо, цас орох бүрд усанд автаж байхад багш нар эцэг, эхчүүдтэй хамтарч засвар хийдэг. Намар ирэхээр дахиад л усанд автчихсан байдаг. Бид хичээлийн шинэ жилтэйгээ зэрэгцээд ангиа шохойдоод зогсож байдаг. Үүнд сургуулийн захиргаа огт анхаардаггүй. Сүүлийн таван жилийн хугацаанд нийт арван захирал солигдсон. БШУЯ томилж тавиад нэг асуудал гарахад халаад, өөр нэг хүнийг дахин томилдог.

Хөгжлийн бэрхшээлтэй хүүхдүүд маань өвлийн куртиктэй хичээлдээ сууж байгаа хэрнээ багш аа, даараад байна гэдэг. Чичрээд сууж байгаа хүүхдүүдэд би хичээлээ зааж чаддаггүй. Халуун газар авч очихоос өөр арга байдаггүй. Зузаан хувцастай найман цаг дохиогоор хичээл заана гэдэг маш хэцүү. Та бүхэн төсөөлөөд нэг үзээрэй. Харин ажил хариуцсан сургуулийн аж ахуйн дарга нь захирлынхаа жолоочийг хийгээд явдаг.
Тиймээс бидний хувьд сургуулийн удирдлагууд ч тэр БШУЯ ч ялгаагүй тусгай сургуулийн багш, ажилчдын эрхийг зөрчиж байна гэж харж байгаа. Яам ямар ч судалгаагүйгээр дарга удирдлагуудыг сольж байгаагаас асуудал ийнхүү хүндэрч байна. Тиймээс холбогдох арга хэмжээг авч, яаралтай сургуулийн байрыг засаж, хичээллэх нөхцлөөр хангаж өгөхийг шаардаж байна.

29-р сургуулийн захирлын үүргийг түр хавсран гүйцэтгэгч н.Анхтуяа:

-Би аравдугаар сарын 12-ны тушаалаар захирлын үүргийг түр хавсран гүйцэтгэж эхэлсэн. Манай сургуульд өнөөдрийн байдлаар 273 сурагч суралцаж байна. Хичээллэхэд хүндрэлтэй хүйтэн гэдэг асуудалд бид өөрсдийн чадах хэмжээндээ жижиг засвар дулаалгыг хийдэг. Сургууль тэр чигтээ бус зарим хэсэг жигүүрт халаалт муу байгаа асуудал байгаа. Бид анги сэлгэлт хийх замаар тус асуудлыг шийдвэрлээд явж байна. Манай сургууль 1989 онд ашиглалтад орсноос хойш ямар ч урсгал засвар хийгдээгүй юм байна лээ. Мэдээж сургуулийн удирдлагын зүгээс асуудлын аль аль талыг харгалзаж холбогдож шийдвэрийг гаргуулахаар ажиллаж байна гэсэн юм.

---