Украины өмнөд хэсгийн Херсон мужаас хэдэн арван мянган энгийн иргэн болон Москвагаас томилогдсон албан тушаалтнуудыг нүүлгэн шилжүүлж байгаа гэж орон нутгийн удирдагч Владимир Сальдо мэдэгджээ.

Түүний хэлснээр, 50-60 мянган энгийн иргэнийг "зохион байгуулалттайгаар, аажмаар нүүлгэн шилжүүлэх" бөгөөд ОХУ-аас томилсон бүх яам, хэлтсийн ажилтнууд Днепр мөрнийг гатлах аж.

Украины зэвсэгт хүчнийхэн Херсон хотын орон сууцны хорооллуудыг бөмбөгдөх тул оршин суугчдыг нэн даруй нүүлгэн шилжүүлэлтэд хамрагдахыг уриалсан мессежийг тус хотын иргэд өнгөрөгч мягмар гаргийн орой хүлээж авсан байна. Харин Украины эрх баригчид ард иргэдийг Оросын энэхүү арга хэмжээг үл тоомсорлохыг уриалсан бөгөөд үнэхээр олон тооны хүнийг нүүлгэн шилжүүлж байгаа эсэхэд эргэлзэж буйгаа илэрхийлжээ.

Херсон хотын нэгэн оршин суугч Украины цэргүүд тус хотыг чөлөөлөх хүртэл хаашаа ч явахгүй бөгөөд "Хүмүүс айж сандраагүйгээс гадна хэн ч нүүлгэн шилжүүлэлтэд хамрагдахыг хүсэхгүй байгаа" гэж "ВВС" агентлагт ярьсан байна.

Тэгвэл Херсон мужийн Украины талын захирагч ОХУ-ыг нүүлгэн шилжүүлэлт нэрээр энгийн иргэдийг барьцаалж, амьд бамбай болгон ашиглахыг хүсэж байгаа гэж буруушаажээ. Түрэмгийлэгч улс эзэлсэн нутаг дэвсгэрээсээ энгийн иргэдийг шилжүүлж, албадан гаргах нь дайны гэмт хэрэгт тооцогддог юм. 

Эх сурвалж: BBC

---