Өвөрмонголчуудын яриа хэллэгийг дооглодогт сэтгэл эмзэглэж явдгаа нэгэн бүсгүй илэрхийлж, дүрс бичлэгээ твиттер хуудаснаа оруулжээ.

Уг жиргээний талаар Хууль Зүй, Дотоод Хэргийн Яамны Төрийн нарийн бичгийн дарга П.Сайнзориг өчигдөр өөрийн цахим хуудастаа "Хошин шогийн хэдэн "хүний эрхийг зөрчигч" алиалагч нар ч бас хувь нэмэр оруулсан даа. Хүн доромжилдгоо урлаг гээд ойлгосон гамшгууд. Хүн доромжилсны төлөө төрөөс шагнал тэмдэг зүүж өгдгөө болимоор юм. Компаниуд зар сурталчилгаа, улс төрийн намууд сонгуульд хүн доромжлогч нараар нүүр царай хийж оодруулдгаа болих хэрэгтэй" хэмээн нийтэлсэн нь хошин урлагийн жүжигчдийн бухимдлыг төрүүлжээ.

Улмаар хошин урлагийн төлөөлөл бол МУГЖ Н.Онон, МУГЖ Н.Ариунболд нар өнөөдөр Хууль зүйн яамны гадна бухимдлаа илэрхийлж, ХЗДХЯ-ны Төрийн нарийн бичгийн дарга П.Сайнзоригийг албан ёсоор уучлалт гуйхыг шаардлаа.

МУГЖ Н.Онон: 

-Төр төлөөлж байгаа хүний хувьд Үндсэн хууль зөрчиж байна. Үндсэн хууль зөрчиж, ажил мэргэжлээр нь хүнийг доромжилсон тул албан ёсоор уучлалт гуйхыг шаардаж байна. Энэ мэргэжлээрээ бид гэр бүлээ тэжээдэг. Бид үр хүүхэдтэй, гэр бүлтэй хүмүүс. Алиа салбадайн хүүхэд гэж хүүхдээ хэлүүлмээргүй байна. Монголын уран бүтээлчдээс уучлал гуй. Танай Хууль зүйн яам төгс үү? Хүний эрхийг төгс хамгаалж байгаа юу? Та өөрөө төгс хүн үү? Та ямар ч алдаа мадаггүй ажилладаг хүн үү? Та нар би л дарга гэхээрээ хүмүүсийг дээрэлхэж, доромжилдгоо боль. Бидэнд алдаа оноо байхыг үгүйсгэхгүй. Үүнийгээ засаж залруулъя гэв.

Хууль Зүй, Дотоод Хэргийн Яамны Төрийн нарийн бичгийн дарга П.Сайнзориг: 

-Энэ асуудлыг өмнө нь гаргаж ирээгүй нь бидний алдаа. Нийгэмд хэвийн бус зүйлийг хэвийн мэт ойлгуулдаг хандлагад хүрсэн байна. Мэдээж нийгмийн тодорхой хөндүүр сэдвүүдийг гаргаж ирэх нь урлагийнхны үүрэг байж болно. Гэхдээ аливаа зүйл хэрээс хэтэрвэл цаашдаа хүмүүс нэгнээ ялгаварлан гадуурхах тогтолцоо үүсэж байгааг би иргэний хувьд шүүмжилж хэлсэн. Ёс зүйтэй хандаж нийгмээ соён гэгээрүүлэх үүрэг чиглэлдээ илүү анхаараасай гэж хүсэж байна. Хэрвээ асуудал байна гэж үзэж байгаа бол та бүхэн гомдол гаргаж болно. Би шалгуулахад бэлэн байна. Доромжлуулсан олон хүн байгаа талийгаач Б.Арго багшаас эхлээд, аливаа юм зохистой хэмжээнд байх ёстойг л би тавьсан гэлээ.

---