Монгол залуус хонины ноосон шүүлтүүртэй агаар цэвэршүүлэгч бүтээжээ. 

Агаарын бохирдлыг бууруулах чиглэлээр өдгөө долоон жил ажиллаж буй М.Оюунгэрэл, биотехнологич мэргэжилтэй М.Батмөнх нарын долоон залуу “Greenpreneurs” төслийн тэмцээнд анх оролцож уг санаагаа олжээ.

Дотоод орчинд хуримтлагдсан хортой нэгдлүүдийг хонины ноос 94 орчим хувь шүүдэг байна. Үүнээс гадна цахилгаан соронзон шинж чанар сайтай аж. 

Хонины ноос нь шинжлэх ухааны салбарт аль хэдийн танигдсан түүхий эд юм. “Эйрий фэлт” компани энэ оны 8-р сард тухайн агаар цэвэршүүлэгчийг худалдаанд гаргасан бөгөөд одоогоор 180 гаруй хэрэглэгч худалдан авсан байна. Хонины ноос ашиглан бүтээгдэхүүн үйлдвэрлэж байгаа Монголдоо анхдагч тус компани оюуны өмчийн эрхээ авчээ. Цаашлаад тухайн санаагаа улам сайжруулж, дэлхийн оюуны өмчийн газраас анхны тоотоор зохиогчийн эрх авахаар зорьж байгаа гэлээ.

Зах зээлд худалдаалагдаж буй бусад агаар цэвэршүүлэгчтэй харьцуулахад үнийн хувьд хоёр дахин хямд, байгальд 100 хувь задардагаараа онцлог ажээ.

---