УИХ-ын гишүүн Д.Ганбат УИХ-ын чуулганы танхимын өмнө мэдээлэл хийлээ.

УИХ-ын гишүүн Д.Ганбат:

-Ханшийн өсөлт, ард түмний амьдрал, төр засгийн эрх баригчдын бялуурсан байдал ямар байгааг бид харж байна. Их зохиолч Д.Нацагдоржийн “Цагаан сар ба хар нулимс” зохиолтой адил зүйл өрнөж байна. Ард түмний амьдрал өдөр бүр хар нулимс болж, эрх баригчдын хувьд өдөр болгон цагаан сар болж байна. Ийм хүнд нөхцөл байдал үүсжээ. Энд дэлгээд тавьсан зүйлсээс харж болно.

Үндсэн хуулийн нэмэлт өөрчлөлт нь үндсэн хуультай адил хүчин төгөлдөр үйлчлэх ёстой. Гэтэл ээлжит бус чуулганаар өөрийн хэдэн хүүхэлдэй, манай намаас худалдаж авсан гишүүдээрээ ийм нөхцөл байдалтай болгосон.

УИХ утгаа алдаж, Засгийн газар 30,40-өөд сайдтай боллоо. УИХ гүйцэтгэх засаглалд хяналт тавих ёстой. Шүүх засаглал тусдаа ажиллаж, бие биедээ харилцан хяналт тавих ёстой. Энэ удаагийн УИХ ямар ч ёс зүйгүй, ёс суртгахуунгүй байна. АН-ын бүлэг сөрөг хүчний үүргээ гүйцэтгэж байгаа юм алга. Даварсан эрх баригчдыг даруулгатай, замбараатай болгоход ард түмэнтэйгээ хамт ажиллаж эхэлнэ. Амьдрал маш хүнд байна.

Төсвийн хэмнэлтийн тухай хууль нэр төдий байна. Төрлийн, ургийн мод үргэлжилж байна. АН-ын бүлэг дотоод асуудлаа өөрсдөө шийдэх ямар ч боломжгүй болсон. Үндсэн хуулийн цэцийг ажиллуулах ямар ч боломжгүй болгосон. Үүгээр УИХ, Засгийн газрыг ямар ч хяналтгүй болгох үйл ажиллагаа явуулж байна. Цаашдаа ард түмэн, хэвлэл мэдээлэл сайн хяналтаа тавих шаардлагатай байна.

Ард түмний амьдрал энд, эрх баригчдын амьдрал тэнд очсон байна. Монголд хууль биелэхээ больжээ. Эрх баригчид хуулиа дагахаа больсон байна. Авлига, албан тушаалаар хүмүүсийг худалдаж авах, УИХ-ын гишүүд хоорондоо наймаалан хууль зөрчих үйлдэл эрх баригчдаас гарч байна. МАН, АН гээд хэлээд байх юм алга.

Олон жил хуулийг гартаа барьж байсан Увсын бүлэглэл юу дуртайгаа хийж байна. Үүнийг та бүхэнд анхааруулъя. Би эсэргүүцлээ илэрхийлж чуулганы нээлтээр УИХ-ын гишүүний картаа УИХ-ын дарга Г.Занданшатарт өгсөн. Хууль тогтоох байгууллага гүйцэтгэх засаглалд эрх мэдлээ шилжүүлэн өгсөн байна гэдгийг үүгээрээ илэрхийлж байгаа юм. Би энэ асуудлыг сүүлийн 2 жилийн хугацаанд хэлж байна гэлээ.

---