Их Британийн шинэ Ерөнхий сайдаар сонгогдсон Лиз Трасс өнгөрөгч мягмар гарагт Хатан хаанд бараалхсанаар албан ёсоор томилогдож, үүрэгт ажилдаа оржээ. Ийнхүү тэрээр Их Британийн 56 дахь Ерөнхий сайд бөгөөд гурав дахь эмэгтэй удирдагч болсон юм.

Ингээд хатагтай Трасс Даунинг Стрит рүү нэн даруй буцаж, Ерөнхий сайдын хувиар ард түмэндээ хандаж анхны мэдэгдлээ хийсэн байна. Тус улсад нүүрлээд буй эрчим хүчний үнийн хямралыг шийдвэрлэх арга хэмжээ авахаас гадна Үндэсний эрүүл мэндийн системийг сайжруулахаа амласан Лиз Трасс "Британичууд энэ хүнд хэцүү эдийн засгийн хямралын шуургыг даван туулж чадна. Манай улсад авьяас, эрч хүч, шийдэмгий байдлын асар их нөөц бий. Бид эдийн засгаа сэргээж, орчин үеийн, хосгүй Их Британи болж чадна" хэмээжээ.

Шинэ Ерөнхий сайдын анхны чухал алхмуудын нэг нь эрчим хүчний үнийн хямралын эсрэг төлөвлөгөө бөгөөд эрх баригчид төлбөрийг царцаах 100 тэрбум фунт стерлингийн багцыг хэлэлцэж байгааг эх сурвалжууд мэдээлжээ. Энэхүү багцын талаар ирэх пүрэв гарагт зарлах төлөвтэй байгаа ба Хөдөлмөрийн намын санал болгосноор ханган нийлүүлэгчдээс гэнэтийн ашгийн татвар авахаас илүүтэйгээр нэмэлт зээлээр санхүүжүүлж магадгүй аж.

Лиз Трасстай уулзахаасаа өмнө Борис Жонсоныг хүлээн авч, огцрох хүсэлтийг нь албан ёсоор зөвшөөрсөн Хатан хаан Элизабет Ерөнхий сайд Трассыг шинэ Засгийн газар байгуулахыг хүссэн билээ. Тэгвэл хатагтай Трасс аль хэдийн томоохон өөрчлөлтүүдийг хийж, гол холбоотнуудаа дээд албан тушаалаар шагнаад байна.

Тодруулбал, Сангийн сайдаар Кваси Квартенг, Гадаад хэргийн сайдаар Жеймс Слеверли, Дотоод хэргийн сайдаар Суэлла Браверман томилогдсон бол хатагтай Трассын хамгийн дотны найзуудын нэг Тереза Коффи Эрүүл мэндийн сайд болон Ерөнхий сайдын орлогчийн суудалд очжээ. Ингэснээр тус улсын "Төрийн дөрвөн том албан тушаал" гэгддэг Ерөнхий сайд, Сангийн сайд, Дотоод хэргийн сайд болон Гадаад хэргийн сайдын албан тушаалд цагаан арьст эрэгтэй томилогдоогүй анхны тохиолдол болж байна.

Ерөнхий сайд Трасс мөн утсаар холбогдох анхны гадаад удирдагчаараа Ерөнхийлөгч Владимир Зеленскийг сонгож, Их Британи Украинд байнгын дэмжлэг үзүүлэхээ амлажээ. Үүний дараа тэрээр АНУ-ын Ерөнхийлөгч Жо Байдентай ярилцаж, Хойд Ирланд дахь худалдааны дүрмийн талаар Европын Холбоотой тохиролцоонд хүрэхийн ач холбогдлыг хэлэлцсэн гэнэ.

Эх сурвалж: BBC, The Guardian

---