БНХАУ-ын Чөндү хотод хатуу хөл хорио тогтоож, ойролцоогоор 21 сая оршин суугчийг гэрээсээ гарахгүй байхыг тушаасан ба өрхийн зөвхөн нэг гишүүнийг зайлшгүй шаардлагатай бараа бүтээгдэхүүн авахаар дэлгүүр орохыг зөвшөөрсөн байна.

Тус хотод өнгөрөгч пүрэв гарагт коронавирусийн халдварын 157 шинэ тохиолдол бүртгэгдсэний 51 нь шинж тэмдэггүй байжээ. Гэвч Хятадын Засгийн газрын "Тэг Ковид" бодлогын хүрээнд цөөхөн тохиолдол бүртгэгдсэн хотуудад ч хатуу хөл хорио тогтоох шаардлагатай юм. Тэгвэл олон нийтийн зүгээс ихээр эсэргүүцэх болсон энэхүү арга хэмжээ нь тус улсын эдийн засгийн өсөлтийг боомилж буйг шинжээчид хэлж байна.

Чөндүгийн албаныхан ойрын өдрүүдэд хотын бүх оршин суугчийг шинжилгээнд хамруулах бөгөөд хязгаарлалтуудыг хэзээ цуцлах нь тодорхойгүй байгаа юм. Одоо тус хот руу орох, гарах хөдөлгөөнийг хааж, бүх нислэгийг цуцалсан ба хичээлийн шинэ жилийн нээлтийг хойшлуулаад байгааг орон нутгийн хэвлэлүүд мэдээлжээ.

Үүнтэй ижил төстэй хязгаарлалт Хятадын Шэньжэнь, Далянь зэрэг бусад бүс нутагт ч үргэлжилж байгаа юм.

Эх сурвалж: BBC

---