ОХУ-ын төрийн өмчит "Газпром" эрчим хүчний компани "Хойд урсгал 1" хоолойгоор дамжуулан Европ руу байгалийн хий нийлүүлэхээ бүрэн зогсоожээ. Албаныхны хэлснээр, тус хоолойд засвар хийх шаардлагатай бөгөөд үйл ажиллагааны хязгаарлалт нь ойрын гурван өдөр үргэлжлэх аж.

Балтын тэнгис дор 1,200 км үргэлжлэх "Хойд урсгал 1" хий дамжуулах хоолой нь Санкт-Петербургийн ойролцоох эргийг Германы зүүн хойд хэсэгтэй холбодог бөгөөд өдөрт дээд тал нь 170 сая шоо метр хий дамжуулах чадалтай.

Гэхдээ Оросын талаас тус хийн хоолойгоор дамжуулдаг хийн экспортоо мэдэгдэхүйц бууруулаад байгаа билээ. Өнгөрсөн долдугаар сард мөн "тоног төхөөрөмжийг гэмтэл"-ийн улмаас 10 хоногийн турш хаагдсан уг хоолой нь түүнээс хойш дөнгөж 20 хувийн хүчин чадалтай ажиллаж байсан. Харин Оросын эрх баригчид эрчим хүчний хангамжаа Барууны орнуудын эсрэг дайны зэвсэг болгон ашиглаж буй гэх шүүмжлэлийг эрс үгүйсгэсэн юм.

Хэрэв ОХУ ойрын өдрүүдэд нийлүүлэлтээ эргэн нээвэл ХБНГУ үүсээд буй нөхцөл байдлыг даван туулах боломжтой гэж тус улсын албаны хүн хэлсэн ч одоогоор бүх зүйл тодорхойгүй байна. Европын удирдагчдын эмээж буйгаар ОХУ шатахууны үнийг улам өсгөхийн тулд нийлүүлэлтээ үргэлжлүүлэн тасалж магадгүй юм.

Эх сурвалж: BBC

---