Удирдлагын академийн 301 тоот танхимыг Монгол Улсын Ардын багш, доктор профессор Г.Миеэгомбын нэрэмжит болгожээ. Тус танхимын нээлтийн ёслолд түүний хүү УИХ-ын дарга асан М.Энхболд болон бусад албаны хүмүүс оролцлоо.

Удирдлагын академийн захирал Д.Сүрэнчимэг:

- Монгол Улсын Ардын багш, доктор профессор Г.Миеэгомбо нь Намын дээд сургуулийг Улс төрийн дээд сургууль болох өөрчлөлт шинэчлэлийн үед арав гаруй жил захирлаар ажилласан. Тус хугацаанд сургуулийн сургалтын агуулга, арга зүй элсэлт, төгсгөлтөд өөрчлөлтийг ихээр хийж гүйцэтгэсэн гэдгийг энд хэлмээр байна. Тэрбээр Удирдлагын академид хамгийн олон жил захирлаар ажилласан хоёр захирлын нэг юм. Нийгэм шилжилтийн адармаатай цаг үед тус сургуулийн өөрчлөлт шинэчлэлийг манлайлж , Намын дээд сургуулийг Улс төрийн дээд сургууль, улмаар Төр нийгэм судлалын академи болгох ажлыг гардан зохион байгуулсан удирдагч гэдгээр нь бид дурсан санадаг билээ. Өөрийн амьдралын арав гаруй жилийг тус сургуультай холбож Удирдлагын академийн сургалт эрдэм шинжилгээний түвшинг шинэ шатад гаргасан учир ийнхүү нэрэмжит танхим болгох шийдвэрийг гаргасан юм.

УИХ-ын дарга асан М.Энхболд:

-Жил гаруйн өмнө тус танхимыг миний аавын нэрэмжит болгож байгааг дуулгаж байсан. Энэхүү шийдвэрийг гаргасан тус сургуулийн удирдлагын хамт олонд үр хүүхэд, төрөл төрөгсдийнх нь өмнөөс чин сэтгэлээсээ талархал илэрхийлэхийг хүсэж байна. Энэхүү арга хэмжээнд тухайн үед аавтай минь хамтран ажиллаж байсан боловсролын салбарын сор сүлд нь болж байсан алдартнууд ирсэн байгаа нь аавтайгаа уулзсан мэт сайхан сэтгэгдэл төрүүлж байна.

Миний аав 1933 онд малчин ард Гомбын хоёрдугаар хүү болон мэндэлсэн. Аав минь амьдралынхаа 40 гаруй жилийг улс эх орныхоо боловсролын салбарт зориулсан. Тэр дундаа дээд боловсролтой боловсрон хүчнийг бэлтгэх, дахин давтан сургаж дадлагажуулах чиглэлд ажилласан. Удирдлагын академийг төгссөн төгсөгчид өнөөдөр төр захиргааны бүхий л нэгжид ажиллаж байна. Тус сургууль монголын төрийн албан хаагчдыг хэрхэн давтан сургаж, чадавхжуулж чадна тэр хэрээр төрийн ажил, нүүр царай, улс орны хөгжлийн асуудалтай шууд холбогдоно гэж ойлгодог. Иймд энэхүү аавын минь нэрэмжит танхимаас хойшид улс орныг авч явах, алдартай, нэр хүндтэй, төрийн зүтгэлтэн гараасай гэж хүсэж байна гэлээ.

 

---