Запорожье атомын цахилгаан станцад осол гарах вий гэсэн болгоомжлол улам нэмэгдсээр байгаа тул Европын Холбооны зүгээс Украинд цацраг идэвхт бодисын эсрэг эмийн таван сая гаруй тунг илгээжээ.

Европын хамгийн томд тооцогддог тус атомын цахилгаан станц нь Оросын цэргийн хүчний мэдэлд орсноос хойш томоохон бай болж, галд өртөх болсон билээ. Станцын үйл ажиллагааг үргэлжлүүлж буй украйн ажилтнуудын "ВВС" агентлагт хэлснээр, Оросын цэргүүд тэдэнд буу тулгаж барьцаалсан бөгөөд байгууламжийг цэргийн бааз болгон ашиглаж байгаа аж. Ойролцоох хэсэгт өрнөж буй байлдааны улмаас АЦС-д тодорхой хэмжээний хохирол учирсан ч одоогоор тус бүсэд цацрагийн түвшин нэмэгдээгүй байгаа юм.

Гэсэн хэдий ч албаныхан цацраг идэвхт иод хүний биед шингэхээс сэргийлдэг бэлдмэлийг зарим бүс нутгийн оршин суугчдад тарааж эхэлжээ. Зөвхөн цацраг идэвхт бодис алдагдсан тохиолдолд хэрэглэхийг зөвлөсөн энэхүү эмийг одоогийн байдлаар Запорожье АЦС-аас 50 км-ийн зайд амьдардаг хүмүүст л түгээж байгаа ч Европын Холбооноос таван сая гаруй тунг нийлүүлсэн нь болзошгүй аюулаас сэргийлж буйн илэрхийлэл.

Сүүлийн хэдэн сарын турш Запорожье АЦС-д нэвтрэхийг шаардсан Олон улсын атомын энергийн агентлагийн баг Украинд хүрэлцэн ирээд байгаа бөгөөд ойрын өдрүүдэд газар дээр нь шалгалт хийх боломжтой болно гэж найдаж байна.

Эх сурвалж: BBC

---