Хятадын Сямэнь боомт хотод загасчид болон тэдний барьсан загаснаас коронавирусийн шинжилгээ авах болжээ. Тус улс дахь "Тэг Ковид" бодлогын хүрээнд хотын эрх баригчид вирус нэвтэрч орох бүх замыг хаахаар ажиллаж байгаа ба загасчид болон тэдний барьсан далайн бүтээгдэхүүнийг өдөр бүр шинжилгээнд хамруулахыг тушаажээ.

Жимэй дүүргийн Улс төр, хууль эрх зүйн хорооны мэдээлснээр, зарим загасчин хууль бус худалдаа хийж, хилийн чанад дахь хөлөг онгоцтой харьцаж байгаа нь "коронавирусийг импортлоход хүргэсэн" аж. Сямэнь хотын Далай тэнгисийг хөгжүүлэх товчооны төлөөлөгч энэ талаар "Одоогийн байдлаар хотын бүх оршин суугч шинжилгээнд хамрагдах шаардлагатай байгаа бөгөөд загаснуудаас ч шинжилгээ авах шаардлагатай" гэсэн юм.

БНХАУ-ын эрх баригчид цар тахлыг тэр чигээр нь устгах бодлогыг тууштай баримталж байгаа ч энэхүү чанга хатуу арга хэмжээг олон иргэн шүүмжлэн, эсэргүүцэх болоод байгаа билээ.

Эх сурвалж: The Guardian

---