Үндэсний их баяр наадамд зөвхөн монгол адуу уралдуулах хууль батлахыг шаардаж, уяачид өнөөдөр тайван жагсаж байна.

Уяачдын төлөөлөл:

Наадамд зөвхөн монгол адуу уралдуулах нь үндэсний соёл, дархлаа оршин тогтнох үндэс болно. 2003 оны хуулийг дахин давтах болоод байгааг эсэргүүцэж байна. Улс төртэй уяачид нь холбогдож, эрлийз адуунууд оруулан хэдэн тэрбумаар нь зараад бизнес болгож байна. Монгол цэвэр адуугаа наадамд уралдуулах шаардлага л тавьж байна. Эрлийз адуу уралдуулж, ашиг олох санаатай хүмүүсийн эсэргүүцэл их байна.

2019 оны нэгдүгээр сард Засгийн газраас Үндэсний их баяр наадмын тухай хуульд нэмэлт өөрчлөлт оруулах тогтоол баталсан. Тогтоолын дагуу 2019 оноос хойш Үндэсний их баяр наадмын тухай хуульд нэмэлт өөрчлөлт оруулах ажил гурван шадар сайдын нүүр үзэж байна. Гэтэл одоо ХЗДХ-ийн сайд Х.Нямбаатар Монгол наадмын утга мөн чанарыг алдагдуулсан хуулийн төслийг өргөн барилаа. Үндэсний морины уралдаанд зөвхөн монгол цусны зургаан насны морь уралдах ёстой атал монгол адууны стандартыг батлах хүртэл таван жилийн хугацаагаар 2025 он хүртэл сэрвээний өндрөөр хэмжинэ гэлээ.

Сэрвээний өндрөөр хэмжвэл хэсэг бүлэг хүмүүсийн эрлийз морьдын уралдаан болно. Үүнээс үүдэн ихэнх аймаг, сумууд наадмаа хийж чадахгүй байдалд хүрнэ. ХЗДХ-ийн сайд Х.Нямбаатар өөрөө эрлийз морь уядаг учраас малчин уяачдын эрх ашгийг зөрчсөн хуулийн төсөл санаачилж, УИХ-д оруулж байгааг эсэргүүцэн тайван жагсаал хийж байна гэлээ.

---