Хятадын нийслэл Бээжин хотын нэгэн эрэгтэй хөл хорионы дүрэм журам зөрчсөний улмаас түүний оршин суудаг орон сууцны 5,000 гаруй иргэнийг тусгаарлалтад оруулсан бөгөөд хууль хяналтынхан тус эрэгтэйн эсрэг эрүүгийн хэрэг үүсгэн, шалгаж байгаа аж.

Тодруулбал, 40 гаруй насны уг эрэгтэй нь 5 дугаар сарын 23-нд халдварын эрсдэлтэй худалдааны төвөөр зочилсон учир албаныхан түүнийг гэрийн тусгаарлалтад орохыг шаарджээ. Гэвч тэрээр тусгаарлалтын хугацаандаа "олон удаа гадуур гарч, халдвар тархах эрсдэл үүсгэсэн" бөгөөд тав хоногийн дараа "Эерэг" гарсан байна. Улмаар, эрх баригчид халдвартай эрэгтэйн ойролцоо амьдардаг 258 хөршийг нь Засгийн газрын тусгаарлах төвд шилжүүлж, харин орон сууцны хорооллын 5,000 гаруй оршин суугчийг гэрээсээ гарахгүй байхыг тушаажээ.

Өнгөрөгч ням гарагт Хятадын тусгаарлалтын байгууламжуудаас гадуур цар тахлын халдварын 122 шинэ тохиолдол бүртгэгдсэн бөгөөд Бээжинд ердөө 12 тохиолдол батлагдсан байна. Тус хотод хэсэгчилсэн хөл хорио тогтоож, аялал жуулчлалыг хязгаарлан, олон нийтийн үйлчилгээний газруудыг хааж, зарим дүүргийн иргэдийг гэрээсээ ажиллахыг шаардсан ч дор хаяж долоо хоногийн турш халдварын шинэ тохиолдол илрээгүй бүсүүдэд номын сан, музей, театр, биеийн тамирын заалнуудыг дахин нээхийг зөвшөөрөөд байгаа юм.

Тус улсын эрх баригчид коронавирусийн "Омикрон" хувилбарын дэгдэлттэй тэмцэхийн тулд чанга хатуу арга хэмжээ авч, өргөн хүрээний хязгаарлалт тогтоосон нь эдийн засаг, иргэд нь сөргөөр нөлөөлж байгаа гэх шүүмжлэлд өртсөн ч тус улсын удирдагч Ши Жиньпин "Тэг-Ковид" бодлогыг үргэлжлүүлж, заавал амжилтад хүрэхийг шаардсан аж.

Эх сурвалж: The Guardian

---