ОХУ-ын домогт "ДДТ" рок хамтлагийн ахлагч, гоцлол дуучин Юрий Шевчук энэ сарын 18-ны өдөр Уфа хотод хийсэн тоглолтынхоо үеэр Украин дахь түрэмгийллийг эсэргүүцсэн үг хэлсэн нь шуугиан тариад байна. Тэгвэл орон нутгийн цагдаа нар түүнийг Оросын армийг "үл хүндэтгэж, нэр төрийг нь гутаасан" хэрэгт буруутгаж байгаа бөгөөд хэрэв гэм бурууг нь тогтоовол 50 мянган рублиэр торгох юм.

Шевчук 8,000 гаруй үзэгчид хандан "Яг одоо Украинд хүмүүсийн амийг хөнөөж байна. Энэ юуны төлөө гэж? Манай залуус яагаад тэнд амиа алдаж байна вэ? Орос, Украины залуучууд дахиад л амиа алдаж байна. Хөгшид, эмэгтэйчүүд, хүүхдүүд юуны төлөө үхэж байна вэ? Манай Цезарийн Наполеоны төлөвлөгөөнөөс болж уу? Эх орон гэдэг бол үргэлж үнсэж үлгэх ёстой Ерөнхийлөгчийн бөгс биш, харин амьдрахын төлөө галт тэрэгний буудал дээр төмс зардаг ядуу эмээг хэлнэ. Энэ л эх орон!" гэж хэлэхэд хүмүүс түүнийг дэмжин, алга ташжээ.

Тэгвэл удалгүй албаныхан тоглолт болсон цэнгэлдэх хүрээлэнд ирж, Шевчукийг цаг гаруйн турш байцаасныг продюсер Радмир Усаев өөрийн олон нийтийн сүлжээндээ бичсэн байна. Тэрээр болсон явдлын талаар "Тэд Юрийг хамтлагийн гишүүд болон менежерээс нь тусгаарлаж, түүнтэй цаг гаруйн турш ярилцсан бөгөөд дайн ба эх орны тухай хэлсэн үгсийнх нь талаар шалгаасан. Тэд эхэндээ Юрийг баривчлахыг хүссэн ч эцсийн мөчид ухаантай алхам хийж, түүнийг цагдаагийн мэдэгдэлд гарын үсэг зурахыг хүссэн" хэмээжээ.

Юрий Шевчук нь Ерөнхийлөгч Владимир Путинтэй өмнө нь сөргөлдөж байсан бөгөөд Крымийг Орост нэгтгэхийг эсэргүүцэж буйгаа шууд илэрхийлж байсан. Түүнчлэн тэрээр Сибирийн Тюмень хотод болох тоглолтынхоо үеэр Оросын зэвсэгт хүчинд дэмжлэг үзүүлэх бэлгэ тэмдэг болох "Z" үсэг бүхий туг байрлуулахаас татгалзсаны улмаас эрх баригчид тус арга хэмжээг цуцалсан билээ.

Эх сурвалж: The Moscow Times, Радио Свобода

---