Хятадын Шанхай хотын супермаркет, худалдааны төв, ресторануудыг өнөөдрөөс /2022.05.16/ эхлэн хязгаарлагдмал хүчин чадлаар нээхийг орон нутгийн албаныхан мэдэгджээ.

Хотын дэд дарга Чен Тонг өнгөрөгч ням гарагт болсон хэвлэлийн бага хурлын үеэр "Хүмүүсийн урсгалыг бууруулах" арга хэмжээг хэрэгжүүлсэн хүнсний дэлгүүр, худалдааны төв, эмийн сангуудыг дахин нээхийг зөвшөөрнө гэжээ. Мөн ресторан, хоолны газрууд авч явах үйлчилгээ үзүүлэх боломжтой болсон байна.

Гэвч Шанхайн тээврийн хэлтэс хотын бүх метроны шугам хаалттай хэвээр байна гэж мэдэгдсэн бөгөөд тус үйлчилгээ хэзээ хэвийн үйл ажиллагаанд орох нь тодорхойгүй байгаа юм. Түүнчлэн, оршин суугчид гэрээсээ гарч болох эсэхийг бүс нутгийн эрх баригчид тодруулаагүй байгаа бөгөөд энэхүү шинэ арга хэмжээ хэрхэн хэрэгжихийг иргэд анхааралтай ажиглаж байна. Хэдийгээр тус хотод өнгөрсөн 3 дугаар сарын сүүлээр албан ёсны хөл хорио тогтоосон ч олон хүн түүнээс удаан хугацаанд гэртээ гацаад байгаа билээ.

Шанхайд цар тахлын халдварын тохиолдол буурахын хэрээр 25 сая хүн амтай хотыг үе шаттайгаар эргэн нээнэ гэж албаныхан амласан ч хязгаарлалтууд хүчинтэй хэвээр байгаа юм. Ажилдаа явж эхэлсэн оршин суугчдыг Олимпын наадмын үеийн "хаалттай" системд оруулснаар тэд гэртээ харих боломжгүй, харин ажил дээрээ амьдрах ёстой болжээ.

Хятад улс даяар өнгөрөгч ням гарагт коронавирусийн 1,718 шинэ тохиолдол бүртгэгдсэн бөгөөд эдгээрийн дийлэнх нь шинж тэмдэггүй халдвар байсан гэж мэргэжилтнүүд тэмдэглэсэн байна.

Эх сурвалж: AP

---