УИХ-ын чуулганы хуралдаанаар Хөтөлийн цемент шохойн үйлдвэрийг хувьчлах тухай 2015 оны заалтыг УИХ-ын тогтоолоос хасах асуудлыг хэлэлцсэн ч МАН-аас нэг хоногийн завсарлага авч хуралдааныг өндөрлүүллээ.

Тус тогтоолын төсөлд “Төрийн өмчийг 2015-2016 онд хувьчлах, өөрчлөн байгуулах үндсэн чиглэл батлах тухай” УИХ-ын 2015 оны долдугаар сарын 03-ны өдрийн 70 дугаар тогтоолын хавсралтаар баталсан "Төрийн өмчийг 2015-2016 онд хувьчлах, өөрчлөн байгуулах үндсэн чиглэл"-ийн “4.17.”Хөтөлийн цемент шохой” төрийн өмчит хувьцаат компанийн төрийн эзэмшлийн хувьцааг өр төлбөрийг төлөх нөхцөлтэйгөөр хөрөнгө оруулагч талд санал болгон хувьчлах” гэснийг хассугай" хэмээн заажээ. Тус асуудалтай холбогдуулан УИХ-ын гишүүд асуулт асууж, хариулт авч байр сууриа илэрхийллээ.

УИХ-ын гишүүн Б.Энхбаяр:

- 2015 онд Хөтөл цемент шохойн үйлдвэрийг хувьчлах тухай УИХ-ын тогтоолыг хүчингүй болгох асуудлыг хэлэлцэж байна. Тухайн үеийн сайд Х.Баттулгын гарын үсэгтэй, Худалдаа хөгжлийн банкны үүсгэн байгуулагч Д.Эрдэнэбилэг нарын оролцоотой энэ хувьчлал буруу замаар орсон гэдэг нь тодорхой болсон. Нэг өдрийн дотор бүх ажиллагаа нь явагдсан юм билээ. Энэ компанийн үүсгэн байгуулагч нь Улсын дээд шүүхийн шүүгч М.Батсуурийн аав. Тухайн үед Худалдаа хөгжлийн банкны Хуулийн хэлтсийн захирал байсан. Энэ ийм гинжин схем явсан. Энэ луйврыг төр буцааж авч байгаа санаачилгыг дэмжиж байна. Хэдий хожуу илэрч байгаа ч үүнд хариуцлага тооцох ёстой. Гэхдээ Х.Баттулга гэдэг хүний нэр холбогдсон болохоор хариуцлага тооцох асуудал нь сааталтай байна уу үгүй юу. Хэрэг үүсгэж байгаа асуудалд энэ хүн шалгагдаж байгаа юу.

Долоон жилийн өмнө гаргасан хувьчлах шийдвэрийг хүчингүй болгохоор энэ хугацаан дахь эрхзүйн үр дагавар юу болох вэ. Огт хувьчлаагүй гэх үү. Энэ хугацаанд гарсан гэмт хэргийг яах вэ? Энэ нэг тийм жишиг тогтоох гээд байна.Ер нь шууд хурааж авах нь зөв байсан уу. Хэрвээ хурааж авах ёстой байвал манай Үндсэн хууль ёсоор үүнийг хувийн өмч гэж үзнэ. Асуудал шүүхийн шийдвэрээр явна. Тийм учраас УИХ-ын шийдвэр Үндсэн хуульд нийцэх ёстой, энэ асуудлыг юу гэж харж байгаа вэ. 

ЗГХЭГ-ын дарга Ц.Нямдорж:

- Мөрдөн байцаалтын шатанд хэнийг шалгаж байгаа талаарх мэдээлэл Засгийн газарт байхгүй. Ганц нэг хүнийг тодорхой хугацаар хорьсон гэдэг мэдээлэл гарсан. Цаашид яахын би мэдэхгүй. Тухайн үед юу болоод өнгөрснийг харин би гадарлана. 2011 онд концессийн гэрээг арван жилийн хугацаанд байгуулсан байдаг. Бейсмент компанитай тус гэрээг байгуулсан. Нэг хүнтэй, нарийн ярих юм бол хөрөнгийн тодорхой эх үүсвэр бараг байхгүй.

2015 онд хууль зөрчсөн шийдвэр гаргуулж авчхаад тус компаниа татан буулгаад Хөтөл болж хувирсан. Хөтөлийг 2008 онд Мишиг гэж хүн байгуулсан байдаг. Энэ бол дээд шүүхийн шүүгч М.Батсуурийн аав мөн. Би энийг олон жил ярьж байгаа. Одоо учир нь тайлагдаж эхэлж байх шиг байна. Эрх зүйн үр дагаврын хувьд УИХ хууль зөрчөөд тогтоол гаргачихсан учраас хүчингүй болж таарна. УИХ-ын тогтоол хүчингүй болох нь ойлгомжтой. Хууль, их хурлын тогтоолын алиныг нь мөрдөх вэ гэдэг асуудал дээр мөрдөгчийн тогтоол ирэх үед тавигдсан.

Мэдээж зарчмаараа хуулийн хүчинтэй заалтыг дагаад Засгийн газар өмнө нь гаргасан байсан шийдвэрүүдийг хүчингүй болгох арга хэмжээ авсан. Цаашдаа энэ асуудалд нарийн нарийн асуудал шалгагдах байх аа. Хөгжлийн банкнаас Хөтөл компанид өгсөн зээлийн дийлэнх нь буцаад ХХБ-д орчихсон. Их хүнд зүйл ангиар шалгагдаж байгаа хэргийн цаад асуудлыг хуулийн байгууллага шалгаж байгаа учраас илүү дэлгэрэнгүй мэдээлэл өгч чадахгүй байна. Анх 2014 оноос Дарханыг, 2015 онд Хөтөлийг, 2016 онд Эрдэнэтийг ийм байдлаар авсан. Тодорхой эзэнтэй, нэг хүн удирддаг ийм л зүйл байсан гэв.

---