БНАСАУ-д коронавирусийн халдварын анхны тохиолдол албан ёсоор бүртгэгдэж, улмаар үндэсний хэмжээнд хатуу хөл хорио тогтоохоор болжээ.

Тус улсын төрийн мэдлийн хэвлэлээр мэдээлснээр, нийслэл Пхеньян хотод "Омикрон" хувилбарын дэгдэлт үүссэн ба халдварын тохиолдлын тоо нь тодорхойгүй байгаа аж. Умард Солонгосын "хорио цээрийн фронт"-од учирсан "онцгой байдлын хамгийн том хэрэг" хэмээн тодорхойлсон энэхүү нөхцөл байдлын эсрэг хариу арга хэмжээ авахаар тус улсын удирдагч Ким Жон Ун яаралтай хурал зохион байгуулсан байна.

Умард Солонгосын эрх баригчид Хятад болон Барууны орнуудын санал болгосон "Синовак", "АстраЗенека" вакцинуудаас татгалзаж, хүн амынхаа дунд цар тахлын эсрэг дархлаажуулалтын хөтөлбөрийг хэрэгжүүлээгүй билээ. Харин коронавирусээс сэргийлэх үүднээс хилээ хааж, чанга хатуу хязгаарлалт тогтоосны улмаас эдийн засгийн хямрал, хүнсний хомстолд нэрвэгдсэн юм.

Гэвч тус улсад өмнө нь цар тахлын хэд хэдэн батлагдаагүй тохиолдол илэрсэн гэж ажиглагчид үзэж байна. Тодруулбал, хөрш зэргэлдээ Хятад, Өмнөд Солонгос улсуудад томоохон дэгдэлт гарсан бөгөөд Хятадын Засгийн газар "Омикрон"-ы давлагааг дарахын тулд тэмцсээр байгаа юм.

Эх сурвалж: BBC

---