Өмнөд Солонгосын Засгийн газар коронавирусийн хязгаарлалтуудаа үргэлжлүүлэн цуцалж байгаа бөгөөд олон нийтийн газарт амны хаалт зүүх шаардлагыг өнөөдрөөс эхлэн хүчингүй болгожээ. Тус улсад өнгөрөгч ням гарагт халдварын 20 мянга орчим шинэ тохиолдол бүртгэгдсэн нь сүүлийн гурван сарын хамгийн бага үзүүлэлт аж.

Амны хаалтын шаардлага нь тус улсад 2020 оны 10 дугаар сараас хойш хэрэгжсэн бөгөөд уг дүрмийг зөрчсөн хүмүүст торгууль ногдуулах боломжтой байсан юм. Тэгвэл "Омикрон"-ы халдварын давлагааны оргил үе өнгөрч, тус улсын эрүүл мэндийн тогтолцооны хариу арга хэмжээ тогтвортой хэвээр байгаа тул эрх баригчид хязгаарлалтаа цуцлахаар шийдвэрлэсэн байна.

Гэхдээ нэг дор 50 ба түүнээс дээш тооны хүн цугларсан тохиолдолд амны хаалт зүүх шаардлагатай бөгөөд бусад үед ч бие биеэсээ нэг метрийн зайд байх боломжгүй бол амны хаалт хэрэглэхийг эрүүл мэндийн мэргэжилтнүүд зөвлөсөн юм. Түүнчлэн, коронавирусийн шинж тэмдэг илэрсэн, эсвэл халдвар авах өндөр эрсдэлтэй хүмүүст энэхүү зөвлөмж хамаарах аж.

БНСУ-ын эрх баригчид өнгөрсөн 4 дүгээр сард цар тахлын үеийн ихэнх дүрэм журмыг цуцалснаар хувийн цугларалт болон үйлчилгээний байгууллагуудын үйл ажиллагаа явуулах цагт хязгаарлалт байхгүй болсон билээ. Одоогийн байдлаар тус улсын нийт хүн амын 86.8 хувь нь коронавирусийн эсрэг вакцинжуулалтад бүрэн хамрагдсан бөгөөд 64.5 хувь нь нэмэлт тунгаа тариулсан бол 4.1 хувь нь хоёр дахь нэмэлт тундаа хамрагджээ.

Эх сурвалж: Yonhap News Agency

---