Ашигт малтмалын хайгуулын тусгай зөвшөөрөл олгох сонгон шалгаруулалтыг цахимаар дуудлага худалдаагаар олгох журмыг цуцлах шаардлагыг орон нутгийн иргэд төрийн гурван өндөрлөгт уламжиллаа.

Ашигт малтмалын тусгай зөвшөөрлийг цахимаар дуудлага худалдаагаар олгож байгаа нь орон нутгийн иргэдийн оролцоо, хяналтгүй олноор зарах үйлдэл болж байгаа тул иргэд үүнийг эсэргүүцэж буйгаа илэрхийлэв.

Цахимаар олгох журмаа хэрэгжүүлэхдээ иргэдээс урьдчилан хэлэлцүүлэг хийлгэх ёстой байтал уг журмыг шууд хэрэгжүүлсэн. Цахим олгож эхэлснээр тухайн орон нутгийн иргэдээс зөвшөөрөл авдаг байдал үгүй болж, дур мэдэн нутгийн иргэдийн амьдарч байгаа газрыг авч байгаа хэрэг юм. Ер нь бол орон нутгийг минь тохиролцоод зардаг болж байна гэж нутгийн иргэд бид хардаж байгаа хэмээн үзэл бодлоо илэрхийлэв.

Түүнчлэн төрийн гурван өндөрлөгт дээрх журмаа эргэн харахаас гадна доорх шаардлагыг давхар хүргүүлсэн юм.

Одоогоор нийт 2565 тусгай зөвшөөрлийг 1645 аж ахуйн нэгж эзэмшин үйл ажиллагаа явуулж байна. Эдгээр ААН-с улсын төсөвт оруулдаг орлогын 90 орчим хувийг сүүлийн нэг жилийн хугацаанд зөвхөн нэг бүхий 10 ААН дангаар бүрдүүлж, ихэнх нь орон нутаг болон татвар төлөхгүй явж ирсэн. Иймээс эрдэс баялгийн салбарт үйл ажиллагаа явуулж буй компаниудад тавих шаардлагыг өндөржүүлэх, тусгай зөвшөөрөл эзэмшигчийн үйл ажиллагаа хуульд нийцэж байгаа эсэхийг нэг бүрчлэн хянаж шалгах шаардлагыг орон нутгийн иргэд тавьсан юм.

---