Шинэ Зеландад инфляц өсөж, өргөн хэрэглээний барааны үнэ нэмэгдсээр байгаа тул орон нутгийн худалдан авагчид хүнсний бараа бүтээгдэхүүнээ Австралиас хүргэлтээр захиалж авах болжээ.

Нийслэл Веллингтоны оршин суугч эмэгтэйн хэлснээр, Австралийн хүнсний дэлгүүрүүдэд илүү олон төрлийн бүтээгдэхүүн байдгаас гадна Шинэ Зеландын лангуун дээрх бараануудтай харьцуулахад хамаагүй хямд үнэтэй байсан нь түүнийг ихэд цочирдуулсан байна. Одоо тэрээр ойролцоох дэлгүүрээсээ худалдан авалт хийхийн оронд цахимаар тогтмол захиалга өгч, Австралиас хүнсээ цуглуулж байгаа аж.

Хэдий энэ арга нь цаг хугацааны хувьд алдагдалтай ч иргэд хүнсний зардлынхаа 25 ба түүнээс дээш хувийг хэмнэж буйгаа дурджээ. Хүнсний бараагаа онгоцоор тээвэрлэж авах нь цаг уурын өөрчлөлтөд сөрөг нөлөөтэйд олон тооны худалдан авагч санаа зовниж байгаа ч Шинэ Зеландад хүнсний үнэ огцом өсөж байгааг онцолсон юм.

Тус улсад өнгөрөгч 3 дугаар сард хүнсний үнэ өмнөх жилийн мөн үеэс 7.6 хувиар өссөн нь сүүлийн 10 гаруй жилийн хамгийн өндөр өсөлт аж. Мөн жилийн инфляц нь 6.9 хувьд хүрсэн нь сүүлийн 30 жилийн хамгийн өндөр үзүүлэлт бөгөөд олон улсын хурцадмал байдлын улмаас энэ тоо цаашид улам өсөх төлөвтэй байгааг Сангийн сайд Грант Робертсон мэдэгдсэн байна.

Түүнчлэн жимс, хүнсний ногооны үнэ 18 хувиар өссөн нь шатахууны өндөр үнэ, түрээс болон ипотекийн зээлийн төлбөрт аль хэдийн дарагдаад буй олон өрхөд хүндээр тусаж байна.

Эх сурвалж: The Guardian

---