АНУ-ын Ерөнхийлөгч Жо Байдены засаг захиргааны коронавирусийн тархалтыг бууруулахын тулд нийтийн тээвэрт амны хаалт зүүх шаардлагыг сүүлийн 14 сарын хугацаанд хэрэгжүүлж байсан ч холбооны шүүгч уг удирдамжийг хууль бус гэж үзэн, цуцалжээ.

Флорида мужийн Тампа хотод "Эрүүл мэндийн эрх чөлөөг хамгаалах сан" хэмээх бүлэг энэ шаардлагыг талаар өнгөрсөн онд нэхэмжлэл гаргасны дагуу дүүргийн шүүгч Кэтрин Кимбалл Мизелл ийм шийдвэрт хүрсэн байна. Түүний хэлснээр, АНУ-ын Өвчний хяналт, урьдчилан сэргийлэх төв нь бүрэн эрхээ хэтрүүлэн ашиглаж, олон нийтийн саналыг тусгаагүй бөгөөд тогтоосон дүрэм журмаа хангалттай тайлбарлаагүй аж.

Уг мэдэгдлийн дараахан, "United Airlines" болон "Alaska Airlines" зэрэг компани орон нутгийн бүх нислэгийнхээ хязгаарлалтыг зөөлрүүлж, амны хаалтын шаардлагыг нэн даруй хүчингүй болгосон байна. Харин Цагаан ордны зүгээс уг шийдвэрийг "урам хугалсан явдал" гэж нэрлэсэн бөгөөд Өвчний хяналт, урьдчилан сэргийлэх төв иргэдийг нийтийн тээврийн хэрэгсэл дотор амны хаалт зүүхийг зөвлөсөөр байгаа гэжээ. АНУ-ын засаг захиргааны агентлагууд дараагийн боломжит алхмуудыг үнэлж байгаа ба шүүхийн шийдвэрийг давж заалдах, эсвэл тушаалын хэрэгжилтийг хойшлуулахыг хүсэх боломжтой.

Тус улсад цар тахлын халдварын тархалт дахин нэмэгдэж байгаа ба сүүлийн долоо хоногт өдөрт дунджаар 36,251 шинэ тохиолдол бүртгэгдэж, 460 хүн нас барсан юм.

Эх сурвалж: Reuters

---