АНУ-ын Нью-Йорк хотын Брүклин дүүрэгт байрлах Сансет Паркийн 36 дугаар гудамжны метроны буудалд өнгөрөгч мягмар гаргийн өглөө зэвсэгт халдлага болж, 20 гаруй хүн шархадсан билээ. Тэгвэл хотын цагдаа нар тус хэрэгтэй холбоотой байж болзошгүй этгээдийг тогтоожээ.

Албаныхны мэдээлснээр, 62 настай Фрэнк Р Жэймс гэх эрэгтэй нь уг хэрэгтэй холбоотой байж магадгүй фургон машиныг түрээсээр унаж байсан бөгөөд тус машины түлхүүрийг хэргийн газраас олсон байна. Одоо ноён Жеймсийг эрэн сурвалжилж байгаа ч түүнийг сэжигтнээр нэрлээгүй гэдгийг цагдаа нар онцолсон юм. Гэхдээ албаны хүмүүс түүнийг гэмт хэргийн талаар мэдээлэлтэй байж магадгүй гэж үзэж байгаа юм.

Нью-Йоркийн цагдаагийн газрын албан ёсны мэдэгдэлд "Бид түүнийг уг халдлагатай холбоотой эсэхийг тогтоохоор хайж байна. Түүний байршлыг мэдэж буй иргэдийг бидэнтэй холбогдохыг хүсэж байна" хэмээн тэмдэглэжээ.

Фрэнк Р Жэймс нь сүүлийн жилүүдэд олон нийтийн сүлжээндээ олон арван бичлэг байршуулахдаа хэт туйлширсан үзэл бодол илэрхийлсэн байсан бөгөөд хамгийн сүүлд Нью-Йорк хотын дарга Эрик Адамсыг шүүмжилсэн гэж "The New York Times" сонин мэдээлсэн байна.

Энэхүү зэвсэгт халдлагын үеэр долоон эрэгтэй, гурван эмэгтэй буудуулсан бөгөөд дахиад 13 хүн утаанд хордож, унаж бэртэн, сэтгэл нь түгших байдлаар хохирсон аж. Харин хэргийн газраас зугтсан халдагчийг тогтоохоор мөрдөн байцаагчид идэвхтэй ажиллаж байгаа ба гэмт хэрэгтнийг баривчлахад хүргэсэн мэдээлэлд 50 мянган ам.долларын шагнал санал болгожээ.

Эх сурвалж: BBC

---