Энхтайваны гүүрний зүүн талд, Дунд гол урсдаг хэсгийн 11.8 га газарт “Азид хамгийн томд тооцогдох усан парк, спорт цогцолбор соёл амралтын хүрээлэн”-г барихаар болсон. Гэвч тус газарт усан парк бус орон сууцны хороолол барихаар болсон талаар мэдээлэл гарч эхэлсэн.

Энэ талаар тус усан парк барих “M&G” констракшны гүйцэтгэх захирал А.Амарбаясгалан мэдээлэл хийлээ. 

- M&G” констракшн анх 2008 онд НЗД-ын захирамжаар 11,8 га газрыг орон сууцны зориулалтаар гэрчилгээ авсан. 2011 онд тус газар ногоон байгууламж болохоор захирамж өөрчлөгдсөн. Улмаар манай компанийн зүгээс усан паркийн цогцолбор барих төслийг 2013 оноос хэрэгжүүлж эхэлсэн.

Бид тухайн үед зураг төслөө Английн компаниар сая 200 мянган ам.доллароор хийлгэсэн. Усан паркийг огт зогсоосон зүйл байхгүй. Үйлчлүүлэгчдийн хувцас солих өрөө болон техникийн өрөө баригдаж эхэлснийг орон сууц барьж эхэлсэн мэтээр мэдээлэл тарааж байна. Хил гаалийн асуудлаас болж бид одоогоор зөвхөн бетон карказын ажлыг хийж гүйцэтгээд явж байна.

Нийт төслийн зөвхөн усан паркийн хэсэг 90 сая ам.долларын санхүүжилт шаардлагатай байсан. Одоо ханш өсөж 90сая-270сая ам.доллар болтлоо өссөн. 2012 оноос эдийн засгийн байдал хүндэрч, Монгол улсад хөрөнгө оруулах гадаадын байгууллага олдоход хүндэрсэн. Санхүүгийн хүндрэлээс болж усан парк төсөл удааширч эхэлсэн.

Харин одоогийн төлөвлөлтөөр Усан парк цогцолборын төсөл бүрэн хэрэгжинэ. Санхүүгийн эрсдэлээ бүрэн тооцоолсон. Хамгийн сүүлийн хугацаа гэхэд 2028 онд ашиглалтад оруулах болно гэлээ.

 

---