Өнөөдөр 15:30 цагаас Засгийн газар ээлжит бусаар хуралдахаар болсныг Сангийн сайд Б.Жавхлан хэллээ. Хуралдаанаар үнэ тогтворжуулах хуулийн төслийг хэлэлцэхээр болжээ.

Тодруулбал, УИХ дахь МАН-ын бүлэг өнгөрсөн долоо хоногийн хуралдаанаараа Засгийн газарт эдийн засгийн нөхцөлд байдал тохируулсан арга хэмжээний санал боловсруулах чиглэл өгсөн. Энэ чиглэлийн дагуу Засгийн газар саналаа боловсруулж, МАН-ын бүлгийн хуралдаанаар хэлэлцсэн байна.

Өнөөдрийн бүлгийн хуралдаанаар үнийг тогтворжуулахын тулд Засгийн газар, Монголбанктай хамтран хэлэлцэж, мах, гурил, шатахууны үнийг тогтворжуулах арга хэмжээ авахаар санал боловсруулсан байна. Гэвч одоогийн байдлаар хуулийн нэр, томъёог эцэслэн шийдвэрлээгүй байгаа ч агуулгын хувьд дэлхий нийтэд үүсээд буй зэвсэгт мөргөлдөөн, геополитикийн асуудлаас шалтгаалан манай улсад нөлөөлж буй үнийг тогтворжуулах арга хэмжээг авна хэмээв. 

Сангийн сайд Б.Жавхлан: 

-Үүссэн нөхцөл байдалтай уялдуулж стратегийн гол бүтээгдэхүүн гэж хэлж болохоор, бидний өдөр тутмын амьдралд шууд нөлөөлдөг шатахуун, хүнсний бүтээгдэхүүнээс мах, гурилны үнийг тогтвортой байлгах үүднээс эрх зүйн орчинд яаралтай өөрчлөлт оруулах шаардлагатай байна.

Энэ удаагийн үнийн өөрчлөлт бол жирийн үеийнхтэй адил эрэлт, нийлүүлэлт, мөнгөний бодлогоор зохицуулагдах асуудал биш. Геополитикийн зүгээс орж ирж байгаа энэ асуудалд гадаад нөхцөл байдал шууд нөлөөлж байна.

Ард түмний нуруун дээр ачаа үүрүүлэхгүй байх зэрэг асуудлыг өнөөдрийн бүлгийн хурлаар голчлон танилцууллаа. Бид одоо үүссэн шокууд дээр анализ хийх хэрэгтэй.

Өргөн хэрэглээний бараан дээр бид шатахуун, мах, гурил дээр анхаарал хандуулна. Бусдыг нь бид дийлэхгүй шүү дээ. Зөвхөн манай улсад ч биш бусад улс оронд энэ хямрал болж байна. Тиймээс төрөөс мах, гурил, шатахууны үнэд хяналт тавьж, зохицуулалт хийхээ илэрхийлж байна.

Шатахууны хувьд биднээс хамаарах зүйл бараг байхгүй. Бид үүн дээр нийлүүлэлтийн шоконд орж болохгүй. Шатахуунтай байхад компаниудын үйл ажиллагаа хэвийн үргэлжилнэ.

Үнийг тогтвортой барихын тулд хувийн хэвшилтэй хамтран ажиллана. Төрөөс бид үнийн асуудалд анхаарал хандуулж, дэмжинэ. Харин хувийн хэвшил, бэлтгэн нийлүүлэгчдийн хариуцлагын асуудал яригдана. Яарах шаардлага байгаа учраас өнөө, маргаашгүй УИХ-ын чуулганы нэгдсэн хуралдаанаар тухайн төслөө хэлэлцүүлэхээр боллоо.

Валютын хувьд сүүлийн жилүүдэд бид хангалттай нөөц цуглуулж чадаагүй. Өнөөдрийн ярьж буй хууль бол богино хугацааны энэ шокийг хэрхэн даван гарахаа шийдэх бол урт болон дунд хугацаандаа Шинэ сэргэлтийн бодлогыг хэрэгжүүлэх нь зүйтэй гэв. 

 

-

---